گوتەبێژی بەڕێوەبەرایەتیی ھاتوچۆی ھەولێر ڕای دەگەیەنێت، کە لە ھەولێر بەھۆی ڕووداوێکی ھاتوچۆ، سێ کەس گیانیان لەدەست داوە.

ئەمڕۆ چوارشەممە 9/1/2019، موقەدەم فازڵ حاجی، گوتەبێژی بەڕێوەبەرایەتیی ھاتوچۆی ھەولێر لە ھەژماری تایبەتیی خۆی، لە تۆڕی کۆمەڵایەتیی (فەیسبووک) ڕای گەیاند: "کاتژمێر 10ی سەرلەبەیانیی ئەمڕۆ، لەسەر ڕێگای بێستانە - قوشتەپە و لەنزیک گوندی کەرزۆر، ئۆتۆمبێلێکی پیکابی دەبڵ بەھۆی تیژڕۆیی و تەڕبوونی رَێگایەکان بە بارانەوە، کۆنترۆڵی لەدەست دا لە ڕێگادا دەرچوو و کەوتە ناو ھەڵدێرێک".

باسی لەوەش کردووە: "لە ئەنجامی ڕووداوەکەدا سێ سەرنشین گیانیان لەدەست دا و شۆفێرەکەش زامدار بوو، زیانێکی زۆریش بەر ئۆتۆمبێلەکە کەوت".

گوتەبێژی بەڕێوەبەرایەتیی ھاتوچۆی ھەولێر داوا لە شۆفێران دەکات: " لەکاتی تەڕبوونی شەقامەکان بە بارانەوە، بە خێراییەکی کەم ئۆتۆمبێل لێبخوڕن، بۆ ئەوەی تووشی لەدەستدانی کۆنترۆڵ نەبنەوە".










باسنيوز