ئێوارەی دوێنێ یەکشەممە بوومەلەرزەیەک بە گوژمی 5.9 بە پلەی ڕیشتەر لە نزیک شاری "گێڵانی ڕۆژئاوا"ی سەر بە کرماشان ڕووی دا کە بەو هۆیەوە 42 کەس بریندار بوون.



بەپێی زانیاریی میدیا فەرمییەکانی ئێران، سەنتەری بوومەلەرزەکە لە 23 کیلۆمەتریی گێڵانی‌ڕۆژئاوا، 31 کیلۆمەتریی "سۆمار" و 38 کیلۆمەتریی سەرپێڵ‌زەهاو و لە 10 کیلۆمەتریی قووڵایی زەوی ڕووی داوە.



زانیارییەکان باس لەوە دەکەن بوومەلەرزەکە لە زۆرێک لە شارەکانی دیکەی کرماشانیش هەست پێکراوە و هاوکات لە باشووری کوردستانیش لە خانەقین ە مەندەلی و ناوچەی گەرمیان و کەرکووک و پارێزگاکانی هەڵەبجە و سلێمانیش هەستی پێکراوە.



ماڵپەڕی میهر لەمبارەوە بڵاوی کردووەتەوە کە ئەو 42 کەسەی کر بریندار بوون، لە کاتی هەڵاتن و ترس و دڵەڕاوكێدا بەهۆی بەربوونەوە بریندار بوون و هەتا ئێستا لەبارەی زیانە مادییەکان هیچ زانیاری و ئامارێک بڵاو نەکراوەتەوە.



هاتنی ئەم بوومەلەرزە بەهێزە لە کرماشان و دەوروبەری لە کاتێکدایە کە پاییزی ساڵی پێشوو بوومەلەرزەیەکی بەهێز سەرپێڵ‌زەهاو و شارەکانی ئەزگلە، جوانڕۆ، سەلاسی باوەجانی، شائاباد و گوندەکانی دەوروبەری هەژاند و تێیدا وێڕای گیان لەدەستدانی زیاتر لە 600 هاووڵاتیی کورد و برینداربوونی 12 هەزار کەس و وێرانبوونی هەزاران یەکەی نیشتەجێبوون، هێشتا بەشێکی زۆر لە دانیشتوانی ئەو ناوچەیە لەناو خێوەت و کابینەدا دەژین.




باسنيوز