وردەکاریی کوشتنی منداڵێکی ئاوارەی رۆژئاوای کوردستان لە سلێمانی، ئاشکرا دەبێت.

مستەفای سێ ساڵە، رۆژی 29-3-2018 لەبەردەم خاڵەکەیاندا لە کەمپی باریکە لە سنووری پارێزگای سلێمانی دیار نەما و دایک و باوکیشی، کە لە رۆژئاوای کوردستان ئاوارەی باشووری کوردستان بوون، لە بنکەی پۆلیسی عەربەت سکاڵایان تۆمار کرد.

پۆلیسی سلێمانی رایگەیاندووە، رۆژی 1-4-2018، تەرمی مستەفایان لەسەر رێگای عەربەت- زەڕایەن دۆزیوەتەوە و دەستیان بە لێکۆڵینەوە لە رووداوی رفاندن و کوشتنەکە کردووە.

هەروەک پۆلیسی سلێمانی رایگەیاندووە، رۆژی 9-8-2018، واتا دوای چوار مانگ و 10 رۆژ، تۆمەتبارێکیان بەناوی (م. ک. ح.) دەستگیر کردووە و پاش کۆکردنەوەی بەڵگە و زانیاریی لەسەر رووداوەکە، تۆمەتبارەکە لە رۆژی 2-1-2019 دانی بە ئەنجامدانی تاوانەکەدا ناوە.

پۆلیسی سلێمانی لە پەیجی تایبەتیی خۆی لە تۆڕی کۆمەڵایەتیی (فەیسبووک) وردکارییەکەی بڵاو کردووەتەوە و رایگەیاندووە، ئەو تۆمەتبارە رایگەیاندووە، لەبەردەم ماڵێکدا ئەو منداڵەی بە ئۆتۆمبێل شێلاوە و دواتریش خستوویەتییە ناو ئۆتۆمبێلەکەی و بەهۆی ئەوەی نەیتوانیوە تەرمەکە لەبەردەم مالەکە دانێتەوە، لەسەر شەقامی گشتیی عەربەت - زەڕایەن فڕێی داوە.

دوای دروستبوونی شەڕی ناوخۆیی لە سووریا لە مانگی ئاداری 2011 و حوکمی تاکلایەنەی توندی پارتی یەکێتیی دیموکراتی (پەیەدە)ی باڵی سیاسیی پارتی کرێکارانی کوردستان (پەکەکە) لە رۆژئاوای کوردستان لەو بەشەی کوردستان، دەیان هەزار هاووڵاتیی کوردی رۆژئاوا پەنایان بۆ هەرێمی کوردستان هێنا و بەشێکیان لە کەمپەکاندا نیشتەجێ کران.











باسنيوز