بەڕێوەبەرایەتیی پۆلیسی ڕاپەڕین لە ڕاگەیاندراوێکدا ئاشکرای کرد، کەسێک لە ڕانیە بەھۆی ڕووداوێکی ھاتوچۆ گیانی لەدەست داوە.

ئەمڕۆ سێشەممە 1/1/2019، بەڕێوەبەرایەتیی پۆلیسی ڕاپەڕین لە پەیجی فەرمیی خۆی، لە تۆڕی کۆمەڵایەتیی (فەیسبووک) ڕاگەیاندراوێکی بڵاو کردەوە، تێیدا ھاتووە: "کاتژمێر 1 و 25 خولەکی بەرەبەیانی ئەمڕۆ لەسەر ڕێگای گشتیی ناو شاری ڕانیە و لە نزیک ترافیکی ڕاپەڕین، ئۆتۆمبیلێکی بارھەڵگر لە جۆری تۆیۆتا کە پێنج سەرنشینی تێدا بوو، لە ڕێڕەوی خۆی لایدا و وەرگەڕا، بەو ھۆیەوە یەکێک لە سەرنشینەکان گیانی لەدەست دا".

باس لەوەش کراوە، کە ئەو کەسەی گیانی لەدەست داوە، ناوی (م، ع)ە تەمەنی 16 ساڵە و لە ڕەگەزی نێرە، ھەروەھا دانیشتووی ڕانیە بوو، دوای توێکاری بۆ تەرمەکەی لە پزیشکی دادوەریی ڕانیە، ڕادەستی کەسوکاری کرایەوە، "سێ لە سەرنشینەکانیش لەژێر چاودێریی پزیشکیدان و یەکێکی دیکە لە سەرنشینەکان لەبەر سەختیی برینەکەی، بەڕێکرا بۆ نەخٶشخانەی فریاکەوتنی سلێمانی".

پۆلیس ڕاپەڕین ئەوەشی خستووەتە ڕوو، کە دۆسیەی لێکۆڵینەوە بۆ ڕووداوەکە کراوەتەوە و شۆفێری ئۆتۆمبیلەکەش بەپێی مادەی 24 لە یاسای ھاتوچۆ بە بڕیاری دادوەر ڕاگیراوە، لێکۆڵینەوەش لە ڕووداوەکە بەردەوامە".









باسنيوز