پەکەکە و حەشد ڕێگرییان لە گەڕانەوەی ئیدارەی شنگال کرد
دوای ڕووداوەکانی ١٦ی ئۆکتۆبەر حەشد شەعبی دەستی بەسەر چەندین ناوچەدا گرت و شنگالیش یەکێک بوو لەو ناوچانە و ئێستا لە لایەن ئەو هێزانەوە چەندین پێشێلکاری دەکرێن.
مەحما خەلیل، قایمقامی قەزای شنگال، بە ماڵپەڕی فەرمیی پارتی دیموکراتی کوردستانی گوت: "هەموو هەوڵێک دەدەین بچینەوە نێو قەزای شنگال، کەچی حەشدی شەعبی و پەکەکە ڕێگڕیمان لێ دەکەن و ڕێگە نادەن ئیدارەی شەرعیی شنگال بچێتەوە نێو قەزاکە."
ئەمڕۆ مەحما خەلیل گوتی کە گەڕاینەتەوە شنگال، بەڵام لە کاتی چوونیان بۆ شنگال ئیدی پەکەکە و حەشدی شەعبی رێگەیان نەدان بچنە نێو سەنتەری شنگالەوە، بڕیار وابوو کە هێزە عێراقییەکان پاسەوانی ئیدارەی شەرعی شنگال بکەن، بەڵام ئەمەیش نەکرا.
مەحما خەلیل دەشڵێ: "لە دەرەوازەی شارەکە وەستاوین و پەکەکە و حەشد بە هێزێکی زۆرەوە لە بەرامبەرمان وەستاون و ڕێگریمان لێ دەکەن."
هاوکات وەیس نایف، سەرۆکی ئەنجومەنی قەزای شنگال، بە ماڵپەڕی فەرمیی پارتی دیموکراتی کوردستانی گوت: "پەکەکە و حەشدی شەعبی بە هێزێکی زۆرەوە لە دەروازەی شاری شنگال هاتنە بەرانبەرمان و ڕیگرییان لێ کردین و نەیانهێشت بگەڕێینەوە نێو شنگال."
نایف، کە ئێستا لە دەرەوازەی شارەکەیە، گوتی: "ئێستا هێزێکی زۆر لە لایەن حەشد و پەکەکەوە کۆ کراونەتەوە و ڕێگە نادەن ئێدارەی شەرعیی شنگال بگەڕێتەوە نێو شنگال، کەچی ئەوانەی ئێستا لە شنگالن ناشەرعین."
نایف ئەوەیشی خستە ڕوو: "گەڕاوەنەمان بۆ شارەکە بە بڕیاری حکوومەتی عێراق و ئەنجومەنی پارێزگای مووسڵە، کەچی ئەوان ڕێز لە هیچ بڕیارێک ناگرن و ئێستا بۆشاییی سیاسی و ئەمنی لە شارەکەدا هەیە."
kdp-
