ئەمڕۆ سێشەممە 16 ئۆكتۆبەر ساڵی 2018، لە ساڵیادی خیانەتی 16ی ئۆكتۆبەری ساڵی 2017، لە ناڕەزایی بە داگیرکردنی خورماتوو لەلایەن حەشدی شەعبییەوە، كاسبكارانی ئەو شارە مانیان لە كاركردن گرت.

ئومێد سڵاح، دووكاندارێك لە بازاڕی "كۆماری"ی شاری خورماتوو، ڕای ڕاگەیاند: "ئێمە ئەمڕۆ سێشەممە 16ی ئۆكتۆبەری ساڵی 2018 وەك دووكاندارەكان و كاسبكارانی بازاڕی كۆماری لە خورماتوو مانمان لە كاركردن گرت و دووكانەكانمان نەكردەوە، بە هۆی ئەوەی ساڵێك پێش ئێستا وەك ئەمڕۆ دووكانەكانمان بەتاڵان بران و پاشان لەلایەن میلیشیاكانی حەشدی شەعبییەوە سووتێنران، هەروەها لەبەرامبەر ئەو خیانەتە گەورەیەی كە لە ئێمەومانان كرا لەو رۆژە ڕەشەدا، مانمان گرتووە".

ئەو دوكاندارە، گوتیشی: "ئێمە هەرگیز ڕووداوەكانی 16ی ئۆكتۆبەر لەبیر ناكەین كە چ كارەساتێكی گەورەمان بەسەردا هێنرا و نەوە دوای نەوە ئەو ڕووداوانەیان بۆ باس دەكەین".

دوێنێ چالاکانی مەدەنی، ڕۆژنامەنووس و کوردانی دڵسۆز لە تۆڕە کۆمەڵایەتییەکان و بە بڵاوکردنەوەی ڕاگەیەندراو لەناو شاری کەرکووک و خورماتوو داواین لە خەڵک کردبوو لە بەرانبەر خیانەتی 16ی ئۆکتۆبەردا بێدەنگ نەبن و مان بگرن

لە 16ی ئۆكتۆبەری ساڵی 2017 میلیشیاكانی حەشدی شەعبی شاری خورماتوویان بە ڕێككەوتن لەگەڵ گرووپێكی خیانەتكاری ناو یەكێتیی داگیر كرد و پاشان میلیشیاكان دەستیان بە تەقاندنە و بەتاڵان بردن و سووتاندنی سەدان خانوو و دووكان و چێشتخانە و كارگەی هاووڵاتییانی كورد كرد و تاوەكوو ئێستاش ئەو هاووڵاتییانە قەرەبوو نەكراونەتەوە و دۆخی ئەمنی شارەكەش تێك چووە و بە سەدان بنەماڵە هێشتا ئاوارە و دەربەدەرن.










باسنیوز