خانمە ڕاگەیاندنکارو هەڵسووڕاوێکی گۆڕان داوا لە هەڵسووڕاوە ناڕازییەکانی حزبەکەی دەکات، بچنە گردی زەرگەتەی شاری سلێمانی.

ئەمڕۆ دووشەممە ١٥ی ١٠ی ٢٠١٨، ژینۆ محەمەد، خانمە ڕاگەیاندنکار و هەڵسووڕاوی گۆڕان، لە پێگەی تایبەتیی خۆی لە تۆڕی کۆمەڵایەتیی (فەیسبووک) بڵاوی کردەوە: ”ئێمە لەکوێدا پێویست بکات، دەنگی نارەزاییمان بڵندە و خاتری ھیچ کەسێکیش ناگرین“.

باسیشی لەوە کردووە کە گۆڕان خۆی بۆ کۆنفرانس و هەڵبژاردنە ناوخۆییەکان لە بچووکترین پۆستەوە تا ڕێکخەر ئامادە دەکات. دەشڵێت: ”من نابمە پارێزەری ھیچ کاکێکی گردەکە، بۆ ئەوەی ڕەخنەی لێنەگیرێت، چونکە منیش وەک زۆرینە دونیایەک ڕەخنە و گلەیم لە سەرەوە بۆ خوارەوە ھەیە“.

ژینۆ محەمەد داوا لە هەڵسووڕاوە ناڕازییەکانی گۆڕان دەکات، ”چیتر لەسەر حسابی ئێمە، ھیچ کاکێکیتر گەورە نەکرێت“ و بانگی کردوون: ”وەرن پێکەوە لە گردەکە داوای گۆڕانکاری بکەین و ھاوار بکەین نەخێر بۆ نائومێد کردنمان. وەرن پێکەوە ڕێگری لە ناحەزانی بزووتنەوەکە بکەین“.

ئەمە لە کاتێکدایە کە بزووتنەوەی گۆڕان بە دۆخێکی ئاڵۆز و پڕ لە کێشەی ناوخۆییدا تێپەڕ دەبێت کە هۆکارە سەرەکییەکەی بۆ تەملیککردنی سەرجەم موڵکەکانی حزبەکە بە ناوی کوڕەکانی نەوشیروان مستەفا و کەمبوونەوەی نیوەی کورسییەکانی گۆڕان دەگەڕێتەوە.











باسنيوز