بەرپرسێکی حکوومی لە شارەدێیەکی سنووری پارێزگای سلێمانی لەلایەن کەسانێکی نەناسراوەوە تەقەی لێ کراوە و کوژراوە.

کەمێک لەمەوبەر هێمن ئیبراهیم، بەڕێوەبەری شارەدێی (ناڵپارێز) لە سنووری شارۆچکەی پێنجوێن لە پارێزگای سلێمانی، ڕايگەیاند، ئەمڕۆ دووشەممە ١٥ی ١٠ی ٢٠١٨، بەڕێوبەری ئاوی ناحیەی ناڵپارێز تەقەی لێکراوە و کوژراوە.

ڕوونیشی کردەوە کە ڕووداوی تەقەکردنەکە لە تەنیشت بەنزینخانەیەکی نزیک شارەدێیەکە بووە. گوتیشی: ”تائێستا ھیچ کەسێک بەتۆمەتی کوشتنی بەڕێوبەری ئاوی ناحیەی ناڵپارێز دەستگیر نەکراوە، بەڵام پەڕاوی لێکۆڵینەوە بۆ ڕووداوەکە کراوەتەوە“.

ڕووداوی تەقەکردنەکە کاتژمێر ٢ی پاش نیوەڕۆی ئەمڕۆ ئەنجام دراوە و ئاسۆ حوسێن کە تەمەنی ٣٣ ساڵە و بەڕێوەبەری فەرمانگەی ئاوی شارەدێی ناڵپارێزە، کوژراوە و دواتر تەرمەکەی ڕەوانەی پزیشکی دادوەریی پێنجوێن کراوە.

ئەمە لە کاتێکدایە کە لە بانگەشەی هەڵبژاردنی لیستی یەکێتیی نیشتمانیی کوردستان بۆ پەرلەمانی کوردستان، "ئارامی" یەکێک بوو لە درووشمە سەرەکییەکانی ئەو حزبە.











باسنيوز