چاپخانەی ئاڤێستای هەرە چالاکی باکووری کوردستان لە پیشانگاکەی هەولێرە
وەشانگەی ئاڤێستا کەلە باکووری کوردستان و بە سەرپەرشتیی "عەبدوڵا کەسکین" بەشداریی ئەم خولەی پیشانگەی نیودەوڵەتیی هەولێری کردووە لە غورفەی (34 K) کتێبەکانی نمایش کردووە و بەر هەردوو زمانی کورد - کورمانجی و تورکی 65 ناونیشانی کتێبی جۆراوجۆری خستووەتە ڕوو.
لە سێزدەیەمین پیشانگەی نێودەوڵەتیی ھەولێر بۆ کتێب، نزیکەی ٣٥ وڵات بەشدارن و ٢٥٠ دەزگای چاپ و پەخش و بڵاوکردنەوە کتێبەکانیان نمایش کردووە و تێیدا زیاتر لە ٧٠٠ ھەزار کتێب نمایش کراون، بەڵام نووسەر و ڕۆشنبیران پێیان وایە لەبەر ئاوڕنەدانەوەی بەرپرسانی پیشانگە لە بەشەکانی دیکەی کوردستان، پێگەی دەزگاکانی چاپ و بڵاوکردنەوەی سێ پارچەی باکوور، ڕۆژئاوا و ڕۆژهەڵات زۆر لاوازە، لە باکوور تەنیا دەزگای چاپ و بڵاوکردنەوەی "ئاڤێستا" و لە ڕۆژهەڵاتیش تەنیا بڵاوکەرەوەی کوردستان بەشداریی کردووە.
ئاڤێستا یەکێک لە دەزگا و وەشانگە گرنگ و پیشەنگەکانە لە تورکیا و باکووری کوردستان لە بواری چاپ و بڵاوکردنەوەی کتێب و فەرهەنگ و ئەدەبی کوردی و بەتایبەت وەرگێڕانی کتێب و نووسینی نووسەرانی پارچەکانی دیکەی کوردستان لە باکووری کوردستان دەوری سەرەکیی گێڕاوە و پێگە و ڕۆڵی دیارە، بەڵام هاوکاری نەکردن و ئاوڕنەدانەوە و گرنگینەدان بە دەزگا و ناوەندەکانی وەشانی پارچەکانی دیکە، بووەتە جێگەی گلەیی و وەک خاڵی لاوازی پیشانگەی نێودەوڵەتیی هەولێر بۆ کتێب لەقەڵەم دەدرێت.
لە کاتێکدا ئاڤێستا زۆربەی ناوەرۆکی کتێبە چاپکراوەکانی تایبەتن بە ئەدەبیات و زمانی کوردی و خزمەتێکی زۆری بە دۆخی کولتووری کوردی لە باکوور کردووە و هۆکارەکەشی ئەوەیە کە چەندین جار لەلایەن دەزگا ئەمنی و دادوەرییەکانی تورکیاوە هەوڵی داخرانی دراوە و پێش بە چاپی هەندێ کتێبی گیراوە.
هاوکات لەمبارەوە مامۆستا ڕەحیم، بەڕێوەبەری چاپەمەنیی کوردستان لە سنە ڕايگەیاند: "یەکێک لە سەرەکیترین هۆکارەکانی بەشدارینەکردنی چاپ و بڵاوکردنەوە کوردییەکانی ڕۆژهەڵات لە پیشانگەی هەولێر، یەکەم دابەزینی بەهای تمەن لە بەرانبەر دۆلار و ڕەوشی ئابووری و هاوکات یەرمەتینەکردنی بەرپرسانی پیشانگە و لەبەرچانەگرتنی دۆخی ئێمە بووە، دەنا دەزگاکانی چاپ و بڵاوکردنەوە لە ڕۆژهەڵات زۆر کتێبی گرنگیان لە بوارە جیاجیاکانی ئەدەب، زمان، مێژوو، کولتوور و توێژینەوە و فۆلکۆر چاپ کردووە کە دەکرێ لێرە ببنە سەرچاوە، بەڵام ئەو گرفتەنا بوونە ڕێگر لەبەردەم بەشاریکردنیان لە پیشانگەی هەولێر".
باسنيوز
