ئەمڕۆ بە بەشداریی دەیان هەزار کەس، جەژنی جمای کوردانی ئێزدی لە پەرستگەی لالش، بەڕێوە دەچێت.

رۆژی شەممە 6/10/2018، یەکەم رۆژی جەژنی جمایە (حەوت رۆژ بەردەوام دەبێت) و پێشبینی دەکرێ زیاتر لە 150 هەزار کوردی ئێزدی لە کوردستان و جیهان بۆ پیرۆزکردنی ئەو جەژنەی خۆیان، روو لە پەرسگەی لالش بکەن.

کوردان ئێزدی بەهۆی هێرش و داگیرکاریی رێکخراوی تیرۆریستی داعشەوە، چوار ساڵە ئەو جەژنەیان پیرۆز نەکردووە، بەڵام ئەمساڵ بەهۆی ئەو ئارامی و پێکەوەژیانە ئاشتیانەیەی لە کوردستان هەیە، دووبارە جەژنەکە پیرۆز دەکەن.

پێشتر حکوومەتی هەرێمی کوردستان بەبۆنەی جەژنی جماوە، حەوت رۆژ پشووی بۆ فەرمانبەرانی کوردی ئێزدی لە فەرمانگە و دامەزراوە فەرمییەکان راگەیاند.

ئێزدییەکان، کە ژمارەیان بە نزیکەی یەک ملیۆن کەس دەخەمڵێندرێت، کوردن و بەشی زۆریشیان کەوتوونەتە باشوور و رۆژئاوای کوردستان، بەشێکیشیان لە باکووری کوردستان، ئەرمینیا، جۆرجیا، رووسیا و ئەڵمانیان.

لە کوردستان پێچەوانەی وڵاتانی دیکەی رۆژهەڵاتی ناوەڕاست، هەموو ئاین و نەتەوە جیاوازەکان بە ئاشتی و ئارامی بە یەکەوە دەژین و پەیڕەوانی هەموو ئاینەکان بەشداریی خۆشی و ناخۆشیی یەکتر دەکەن.









باسنيوز