لە سنووری گەرمیان ھەڕەشە لە کادیرانی پارتی دەکرێت و بەرپرسی ھەڵبژاردنەکانی پارتی لە گەرمیان دەڵێ، ناوی ژمارەیەکی بەرچاوی دەنگدەری پارتی لە لیستی پێش بنکەکانی دەنگدان سڕاوەتەوە، کەچی ناویان لە لیستی ناو بنکەدا ھەیە.

ڕەھێل جاف، بەرپرسی ھەڵبژاردنەکانی پارتی لە گەرمیان ئاشکرای کرد: "لە سنووری دەڤەری گەرمیان ھەڕەشە لە بریکارەکانی پارتی دەکرێت و لە ڕێگەی تەلەفۆنەوە ھەڕەشەی ئەشکەنجەدانی کادیرانی پارتی دەکرێت ئەگەر بێت و ڕێگر بن لە ساختەکاری، ئێمەیش لای خۆمانەوە چەندین سکاڵامان تۆمار کردووە و لە مافی ھەڤاڵانمان خۆش نابین و لایەنێکی سیاسی بۆ ئەوەی ساختەکاری بکات ھەڕەشە لە پارتییەکان بکات."

ڕەھێل جاف بە ماڵپەڕی فەرمیی پارتی دیموکراتی کوردستانی ڕاگەیاند: "ناوی ژمارەیەکی بەرچاوی ئەندام و دەنگدەری پارتی نەگەڕاوەتەوە و بێبەش کراون لە مافی دەنگدان، ئەوەش وا ھەست دەکەین دەستێکی لەپشت بێت، چونکە کادیرمان لە ئاستا باڵادا و بە ھۆی نەبوونی ناوەکەی دەنگی نەداوە، یانیش لەو ناوانەی بەردەم دەرگای بنکەکانی دەنگدان ھەندێ ناو سڕاونەتەوە، کەچی ئەو ناوانە لە نێو تۆماری ژۆرەوەدا ھەن."

ئەو بەرپرسەی پارتی دەڵێت: "لە نزیک بنکەکانی دەنگدان قەڵەباڵغییەکی زۆر دروست کراوە و لایەنێکی سیاسی دەیەوێ بشێوی بنێتەوە، لەبەر ئەوەش ئەمڕۆ دەنگدان لە گەرمیان بە چەندین خروقاتەوە تەواو دەبێت."
kdp-