دوو تەقینەوە لە دوو ناوچەی جیای شاری کەرکووک لە باشووری کوردستان روویان دا و ژمارەیەک کەس بوونە قوربانی.


تەقینەوەکان رۆژی پێنجشەممە 27/9/2018 لەڕێی تەقینەوەی دوو بۆمبی چێندراو روویان داوە و بوونە هۆی گیان لەدەستدانی پۆلیسێک و برینداربوونی دوو پۆلیسی دیکە.

بەپێی زانیارییەکان، تەقینەوەی یەکەم لەسەر رێگەی شارەدێی ریاز رووی داوە و بووەتە هۆی گیان لەدەستدانی پۆلیسێک و تەقینەوەی دووەمیش لە نزیک شارۆچکەی داقوق رووی داوە و بووەتە هی برینداربوونی دوو پۆلیس.

دوای داگیرکردنی شاری کەرکووک و ناوچەکانی دەوروبەری، میلیشیاکانی حەشدی شەعبی و هێزە عێراقییەکان بەرپرسیارێتیی پاراستنی ئاسایشی ناوچەکە و هاووڵاتییانیان گرتە ئەستۆ، بەڵام بەهۆی ناکارایی و بێهێزییان، شانە نووستووەکانی داعش و گرووپە تاوانکارییەکان دەستیان بە چالاکی و کردەی تیرۆریستی کردووەتەوە.

ڕۆژی 16ی ئۆكتۆبه‌ری 2017، کەرکووک، خورماتوو و ناوچەکانی دەوروبەری كه‌وتنە ژێر ده‌ستی میلیشیاكانی حه‌شدی شه‌عبی و هێزه‌كانی عێراق، دواتر هه‌ریه‌ك له‌ كۆسره‌ت ڕه‌سوڵ عه‌لی، جێگری یه‌كه‌می سكرتێری گشتیی یه‌كێتی و شێخ جه‌عفه‌ر مسته‌فا، ئه‌ندامی مه‌كته‌بی سیاسی و فه‌رمانده‌ی یه‌كه‌ی 70ی هێزی پێشمه‌رگه‌ی كوردستان، ئاشكرایان كرد كه‌ گرووپێكی نێو یه‌كێتیی نیشتمانیی كوردستان له‌مه‌دا به‌رپرسیارن و ڕێككه‌وتنی ژێربه‌ژێریان له‌گه‌ڵ میلیشیاكانی حه‌شدی شه‌عبی و هێزه‌كانی عێراق كردووه‌ و به‌و هۆیه‌وه‌ سه‌دان پێشمه‌رگه‌ و هاووڵاتی شه‌هید و بریندار بوون و نزیكه‌ی 200 هه‌زار كه‌سیش ئاواره‌ بوون.









باسنيوز