هێمن هەورامی سەرۆکی لیستی پارتی دیموکراتی کوردستان بۆ هەڵبژاردنی خولی پێنجەمی پەرلەمانی کوردستان لە میانی بانگەشەی حیزبەکەی لە ناوچەی قەرەداخی سلێمانی رایگەیاند، ئەو کەس و حیزبەی داوای گەڕاندنەوەی ''دەسەڵاتی قۆرخکراو'' لە هەولێرەوە بۆ سلێمانی دەکات، با جارێ دەسەڵاتە قۆرخکراوەکانی سلێمانی بەو ئەو لایەنە براوەی هەڵبژاردنی ئەنجوومەنی پارێزگای سلێمانی (مەبەست لێی گۆڕان) بداتەوە.

قوباد تاڵەبانی، سەرۆکی لیستی یەکێتیی نیشتیمانیی کوردستان کە هاوکات جێگری سەرۆکی حکومەتی هەرێمی کوردستانە، لە گوتارەکانیدا لە هەڵمەتی هەڵبژاردن بەڵێنی ئەوە دەدات بە لایەنگرانی کە ''دەسەڵاتی قۆرخکراو'' لە هەولێرەوە دێنێتەوە بۆ سلێمانی.

هێمن هەورامی دەڵێت: یەكێتی با جارێ بچن كێشەی ناوماڵ و ناو باڵ و ناو حزبەكەی خۆیان چارەسەر بكەن، ئینجا باس لە چارەسەركردنی كێشەكانی كوردستان بكەن. كەسانێك نەتوانن كێشەی ناوخۆیی خۆیان چارەسەر بكەن، هەر رۆژەی باڵێك و كێشەیەكیان هەبێ، چۆن دەتوانن كێشەی كوردستانییان چارەسەر بكەن.