ژ ئەنجامی ناكوكی و ئالوزیێن دناڤبەرا سوپایێ‌ توركیا و پارتا كرێكارێن كوردستانێ‌ (پەكەكێ‌) د شەڤا بوری دا ل رێكەفتی 7سەر8/9/2018 فروكێن توركیا ب هێجەتا هەبونا بنگەهێن پەكەكێ‌ ب توندی بوردومانا سنورێ‌ ناحیا شێلادزێ‌ كریە و د ئەنجام دا زێدەتر ژ (3) گوندان ب تەمامی هاتنە سوتن لێ‌ ئەو پێزانینێن بدەست (باسنیوز) كەفتین، باس ل هەرسێ‌ گوندێن (بێزەل و شاجا و كوكەرێ‌) كریە.

ئەیوب رەمەزان ـ رێكانی، ئێك ژ خەلك و ئاكنجیێ‌ ناحیا شێلادزێ‌ و خوەدی چەندین باغ و بیستانایە كو هاتنە سوتن گوت: شڤێدی ب توند و دژواری فروكێن توركیا بوردومانا هەرسێ‌ گوندێن (بێزەل و شاجا و كوكەرێ‌) كریە و د ئەنجام دا زیانەكا مەزن گەهشتیە مە چونكە ل وان گوندان باغ و بیستانێن مە ب تەمامی هاتنە سوتن و زێدەباری كو هژمارەكا مەزن یا (مێشێن مە یێن هنگڤینی) ژی هاتنە سوتن و ژناڤبرن.

ناڤبری ئەو چەندە ژی دیاركر: دەما شڤێدی بوردومان ل وان گوندان هاتیە كرن ئەز ل وی جهی یێ‌ بەرهەڤ بوم و مژولی چاندن و چاڤدێریا مێشێن خوە یێن هنگڤینی بوم لێ‌ گیانێ‌ من نەكەفتە بەر مەترسیێ‌ و ژ بلی ڤان هەرسێ‌ گوندێن هاتینە سوتن چەندین گوندێن دیتر ژی ئاگر بەربویێ‌ مینا گوندێن (كاڤلكا و پێپەرخا) چونكە د سنوری دا ئەو گوندە ل سەر وان گوندانە ئەوێن هاتینە سوتن لێ‌ ژ بەر كو هەتا نها ئاگر ب وان گوندان ڤە هەیە و تیمێن ئاگرڤەمراندنێ‌ ژ بەر ئالوزیا پەكەكێ‌ و توركیا نەشێن قەستا وی جهێ‌ رویدانێ‌ بكەن و ئاگری كونترول بكەن لەورا هەرسێ‌ گوندێن (بێزەل و شاجا و كوكەرێ‌) ب تەمامی هاتنە سوتن و ب ئەڤێ‌ سوتنێ‌ زیانەكا مەزن گەهشتیە باغ و بیستان ومێشێن مە یێن هنگڤینی.







باسنیوز