ل سنوورێ قه‌زا زاخۆ ل گۆندێ ده‌شمرێ، ل ده‌مێ كۆلانا پارچه‌كا ئه‌ردى بۆ ئاڤاكرنێ، جه‌به‌خانه‌یه‌كا رژێما به‌عس دهێته‌ دیتن كو 72 گۆلله‌یێن 120 ملیمى تێدا بوون.



قه‌هار قاسم، به‌رپرسێ تیما (MAG) یا راكرنا مینان ل پارێزگه‌ها دهۆكێ، دیار كر: ”ئه‌ڤرۆ رۆژا پێنچشه‌مبى 6/9/2018، تیمێن مه‌ ب سه‌ر جهه‌كى هه‌لبووینه‌ كو هنده‌ك گولله‌یێن 120 ملیمى و ته‌قه‌مه‌نیێن رژێما به‌عس یا گۆربۆگۆر تێدا بوون و هه‌موو هاتینه‌ ده‌رخستن و راكرن بۆ پشكینینێ، به‌لێ هه‌موو به‌لگه‌ وێ چه‌ندێ دووپات دكه‌ن كو ئه‌و گولله‌ یێن سه‌رده‌مێ رژێما سه‌دامى نه“‌.



زێده‌تر دبێژیت: ”ئه‌ڤ گولله‌ و ته‌قه‌مه‌نیه‌ ل گۆندێ ده‌شمرێ سه‌رب قه‌زا زاخۆ ڤه‌ هاتینه‌ دیتن كو ل ده‌مێ كۆلانا ئه‌ردێ پارچه‌كا ئه‌ردى ژلایێ هاوولاتیه‌كى ڤه‌ هاتیه‌ دیتن و ئه‌م ل سه‌ر وێ یه‌كێ هاتینه‌ ئاگه‌هداركرن و ئه‌ڤ جهه‌ دووماهى خالا سنوورى یا رژێما به‌عس بوویه‌ ل سالێن هه‌شتێیان دا“.



قه‌هار قاسم، به‌رپرسێ تیما (MAG) یا راكرنا مینان ل پارێزگه‌ها دهۆكێ خویا كر، كو بۆ كارێن هوسا مه‌ ئامیرێن پشكنینێ هه‌نه‌ و ئه‌ڤ 72 گولله‌ هه‌موو ل سه‌ر ئه‌رد بووینه‌ و ئه‌ڤه‌ پاشمایێن جه‌نگى نه‌، یێن رژێما سه‌دامى د شه‌رێ كه‌نداڤى دا ل سالا 1989 و 1990 بكارئیناینه‌ و ئه‌ڤه‌ وه‌كو پشته‌ك و سنووره‌ك بوو دناڤبه‌را عیراقێ و توركیا دا و گۆت: ئه‌ڤ گولله‌ هه‌موو دێ هێنه‌ ژناڤبرن.
bas news-