بەڕێوەبەرێ شارەدێی سیدەكان ڕایدەگەیێنێت، كەمێك پێش ئێستا، جارێكی دیكە تۆپخانەكانی ئێران دەستیان كردووەتەوە بە تۆپبارانكردنی ژمارەیەك گوندی سەر بە سیدەكان.

ئیحسان چەلەبی، بەڕێوەبەری شارەدێی سیدەكان، بە ماڵپەڕی فەرمیی پارتی دیموكراتی كوردستانی رایگەیاند: "سەعات ١١:٣٠ خولەكی ئەمڕۆ تۆپخانەكانی كۆماری ئیسلامیی ئێران دەستیان كردووە بە تۆپبارانكردنی كوێستانەكانی بەربەزین و بن پەرێزا لە سنووری شارۆچكەی سیدەكان و، ئێستاش تۆپبارانكردنەكە بە چڕی بەردەوامە".

چەلەبی، گوتیشی: "زیانی گیانی نییە و تەنیا ڕەز و باخی هاووڵاتیان زیانی پێ گەیشتووە، بەڵام تاوەكو تۆپبارانكردنەكە نەوەستێت، نازانین قەبارەی زیانەكان چەندە‌".
لای خۆیشییەوە فەرزەنک ئەحمەد، بەرێوبەری ناحیەی حاجی ئۆمەران، بە ماڵپەڕی فەرمیی پارتی دیموکراتی کوردستانی ڕاگەیاند: "ئەمڕۆ سەعات١١ی پێشنیوەڕۆ جارێکی دیکە تۆپخانەکانی وڵاتی ئێران دەستیان بە تۆپبارانکردنی ناوچە سنوورییەکانی ھەرێمی کوردستان لە دەڤەری ئالانەی سەر بە حاجی ئۆمەران کردەووە و تاوەکو ئێستاش بەردەوامە.
فەرزەنک ئەحمەد گوتیشی، تۆپبارانکردنی ئیران بۆ ئەو ناوچانە بە بیانوونی ھەبونی ھێزەکانی پەکەکە و حزبە کوردستانییەکانی ڕۆژهەڵاتی کوردستانە، بەڵام ھیچ ھێزێک لەو ناوچانە نابیندرێت و بەھۆی ئەوەی ئەو ناوچانە چۆڵ کراون تۆپبارانکردنەکە زیانی نەبووە.
kdp-