رێڤه‌به‌ریا پۆلیسێن پارێزگه‌ها دهۆكێ و هاتن و چوون و به‌ره‌ڤانیا باژێرى پلانا خوه‌ بۆ رۆژانێن جه‌ژنا ره‌مه‌زانێ رادگه‌هینن بۆ هندێ رۆژانێن جه‌ژنێ ب ئارامى ل سه‌ر خه‌لكێ دهۆكێ را ده‌رباز ببن.

ئازاد تاها، په‌یڤدارێ رێڤه‌به‌ریا هاتن و چوونا پارێزگه‌ها دهۆكێ د كۆنگره‌كێ رۆژنامه‌ڤانى دا ئاشكرا كر، بۆ جه‌ژنا ره‌مه‌زانێ هه‌موو پۆلیس و ئه‌فسه‌رێن هاتن و چوونێ دێ د ماوێ 24 ده‌مژمێران دا دێ د خزمه‌تا هاوولاتیان دا بن و بۆ ڤێ جه‌ژنێ دێ ئه‌م گرنگیێ ده‌ینه‌ وان جهان یێن زارۆیان لێ هه‌بن بۆ هندێ چو زارۆ تووشى لێدانێن ترۆمبێلان نه‌بن و گۆتیشى: ل شه‌ڤێ دێ چاڤدێریا تمام هێته‌ كرن بۆ هندێ گه‌نج و سنێله‌ یێن بێ مۆله‌ت ترۆمبێلێ نه‌هاژوون.

موقه‌دم ئازاد، ئاشكرا ژى كر، كو ب تنێ مه‌ها ره‌مه‌زانا ئه‌ڤ ساله‌ دا 15 هاوولاتیان گیانێ خوه‌ ب روودانێن ترافیكێ ژ ده‌ست دایه‌ و نێزیكى 60 هاوولاتیان ژى برینداربووینه‌، هه‌روه‌سا د ماوێ شه‌ش مه‌هێن ئێكێ دا ژ ئه‌ڤ ساله‌ 428 روودانێن ترافیكێ په‌یدابووینه‌ و د ڤان روودانان دا 51 هاوولاتیان گیانێ خوه‌ ژ ده‌ست دایه‌ و 435 هاوولاتى ژى برینداربووینه‌.

بێوار عه‌بدولعه‌زیز، په‌یڤدارێ رێڤه‌به‌ریا به‌ره‌ڤانیا باژێرى ل پارێزگه‌ها دهۆكێ، د كۆنگره‌كێ رۆژنامه‌ڤانى دا ئاشكرا كر، مه‌ پلانا خوه‌ بۆ جه‌ژنا ره‌مه‌زانێ دانایه‌ و تێمن مه‌ دێ به‌رهه‌ڤیێن تمام ل هه‌وێن ده‌رینا گه‌نمى كه‌ن و مه‌فره‌زه‌ به‌رده‌وام دێ هاتن و چوونێ ل نێزیك زه‌ڤیێن گه‌نمى كه‌ن و تیمێن نقۆمڤانان ژى دێ ل نێزیك هه‌موو جهێن مه‌ترسى ل سه‌ر رووباران هێنه‌ دانان.

بێوار ئاشكرا ژى كو كو بۆ پاراستنا ده‌خلودانێ هاوولاتیان، 37 تیم هاتینه‌ پێكئینان و نها د كارى دانه‌ بۆ هندێ چو زیانێن مه‌زن ب گه‌نمێ هاوولاتیان نه‌كه‌ڤن و بۆ هه‌ر رووداوه‌كا نه‌خوازراو دێ د خزمه‌ت دابن و گۆت: د ماوێ ئه‌ڤ ساله‌ دا 506 روودانێن سۆتن و كه‌تن و خه‌ندقینێ و لافاوان ل پارێزگه‌ها دهۆكێ په‌یدابووینه‌ و ب كۆژمێ دوو ملیار و 544 ملیۆن دینار زیان و زه‌ره‌رێن مادى ب هاوولاتیێن دهۆكێ كه‌فتینه‌.









باسنيوز