رێڤه‌به‌رێ بازرگانیا ده‌خلودانێ ل پارێزگه‌ها دهۆكێ و رێڤه‌به‌رێ سایلویا فه‌یدیێ، دیاركر، كو حكومه‌تا عێراقى بریار دایه‌ ئه‌ڤ سالا گه‌نمێ جوتیارێن پتر ژ 100 گۆندان ل بنگه‌هێ روڤیا یێ وه‌رگرتنا گه‌نمێ نه‌هێته‌ وه‌رگرتن.



نازم محه‌مه‌د عه‌لى، رێڤه‌به‌رێ بازرگانیا ده‌خلودانێ ل پارێزگه‌ها دهۆكێ و رێڤه‌به‌رى سایلویا فه‌یدیێ دیاركر: "حكومه‌تا عێراقى ئه‌ڤ سالا زیان گه‌هاندنه‌ جوتیارێن پتر ژ 100 گۆندێن ده‌ڤه‌را به‌رده‌رش دگه‌ل جوتیارێن ناحیا روڤیا و كه‌له‌كچى و دینارته‌ ئه‌ڤ سالا گه‌نمێ وان ل بنگه‌هێ روڤیا یێ وه‌رگرتنا گه‌نمێ ناهێته‌ وه‌رگرتن جوتیارێن ده‌ڤه‌را به‌رده‌رش نه‌چاركرینه‌ گه‌نمێ خوه‌ ره‌وانه‌ى سایلویا شێخان بكه‌ن هه‌تا نوكه‌ رێژه‌كا زۆر ترۆمبێلان دسرایێ دانه‌ وهیشتا گه‌نمێ وان نه‌هاتیه‌ وه‌رگرتن گه‌له‌ك هه‌ولدان هاتنه‌ كرن گه‌نم ل بنگه‌هێ روڤیا بهێته‌ وه‌رگرتن لێ حكومه‌تا عێراقى رازیبوون نه‌كریه‌".



رێڤه‌به‌رێ بازرگانیا ده‌خلودانێ ل پارێزگه‌ها دهۆكێ، ژى كر، کو ئه‌ڤ سالا جوتیارێن قه‌زا ئاكرى وشیخان وبه‌رده‌رش دێ گه‌نمێ وان ل سایلویا شێخان هێته‌ وه‌رگرتن وجوتیارێن قه‌زا سیمیل دێ گه‌نمێ وان ل سایلویا فه‌یدێ هێته‌ وه‌رگرتن و جوتیارێن ئامیدى وزاخۆ دێ گه‌نمێ وان ل سایلویا زاخۆ هێته‌ وه‌رگرتن.



ئاشكه‌را كر: "ئه‌ڤ سالا بتنێ دێ ل سایلویا شێخان و فه‌یدیێ و زاخۆ گه‌نم هێته‌ وه‌رگرتن وبریار هاتیه‌ دان 108 هزار ته‌نیێن گه‌نمێ بهێنه‌ وه‌رگرن ئه‌ڤه‌ ژى رێژه‌كا كێمه‌ بۆ دهۆكێ چونكو سالانه‌ پتر گه‌نم دهێته‌ وه‌رگرتن وجوتیار دچینن دێ جوتیار زه‌رمه‌ند بن".



نازم مه‌حمه‌د ئه‌وژى دیاركر: "ئه‌ڤ سالا گه‌نمێ پله‌ ئێك 560 هزار دیناران هێته‌ وه‌رگرتن ژ جوتیاران وگه‌نمێ پله‌ دوو ژى دێ ته‌نا وێ ب كوژمێ 480 هزار دیناران هێته‌ وه‌رگرتن وگه‌نم پله‌ سیى ژى ته‌ن دێ ب 420 هزار دیناران هێته‌ وه‌رگرتن".
bas news-