ئەندامێکی پەرلەمانی کوردستان لە فراکسیۆنی گۆڕان ڕای دەگەیەنێت، پێشتر لە دژی مادەی سێی پرۆژە یاسای چاکسازیی دەنگیان داوە و ئێستاش کێشەیان لەگه‌ڵ ئه‌وه‌ ماده‌یه‌ هه‌یه‌، به‌ڵام گه‌ر بزانن چاره‌سه‌ر ده‌كرێت، ئه‌وكات به‌شداریی كۆبوونه‌وه‌ ده‌كه‌ن.


بەهار مەحموود، ئەندامی پەرلەمانی کوردستان لە فراکسیۆنی گۆڕان لەبارەی کۆبوونەوەی لێژنەی دارایی و یاسایی لەگەڵ وەزیری دارایی لە هەفتەی داهاتوو، ڕایگەیاند: ”هیچم لەسەر کۆبوونەوە پێ نەگوتراوە و نەمزانیوە هەفتەی داهاتوو کۆبوونەوەمان هەبێ“.


ئەو پەرلەمانتارەی گۆڕان، گوتی: ”کێشەی ئێمە لە بابەتی دەرماڵەکانە و ئەو مادەیەی تایبەتە بە دەرماڵە، چونكه‌ هەست دەکەین حکوومەت دەیەوێت بەجۆرێک بیقۆزێته‌وه‌، ئەو پاشکەوتەی پێشتر بە نایاسایی ده‌یبڕى ئەمجارە بە نایاسای و بەناوی بڕینی دەرماڵەوە بەکاری بهێنێت، لەبەر ئەوە ئێمە تیبینیمان لەسەر ئەو مادەیە هەیە و قسەی خۆمان لەسەر کردووە“.


لەبارەی بەشداری کردنی ئەندام پەرلەمانەکانی گۆڕان لە کۆبوونەوەکانی داهاتووی لێژنەکانی دارایی و یاسای، کە تایبەتە بە پرۆژەی چاکسازیی، بەهار مەحموود دەڵێت: ”بابزانین چۆن دەبێ و بە چ ڕوویه‌كدا دەڕوات، ئەگەر بزانین بابەتی دەرماڵەکان چاک دەکرێ بەشدار دەبین“.









باسنیوز