بە هەزاران خێزانی ئێزدی بە هۆی داعش و حەشدی شەعبییەوە ئاوارە بوونە و چەندین خێزانی ئێزدی لە چیای شنگالن. بەرپرسێکی سەربازی لە چیای شنگال دەڵێت، ئەم خێزانانە لە ترسی حەشدی شەعبی ناتوانن بگەڕێنەوە نێو شنگال.

قاسم شەشۆ، بە ماڵپەڕی فەرمیی پارتی دیموکراتی کوردستانی گوت: "زیاتر لە دوو هەزار خێزان لە چیای شنگالن و دەترسن بگەڕێنەوە نێو شنگال لە ترسی هەبوونی حەشدی شەعبی لە نێو سەنتەری شنگال، چونکە حەشدی شەعبی بە دیان پێشێلکاری لەگەڵ خەڵک دەکات."

دە قاسم شەشۆ دەشڵی: "ئەگەر شنگالییەکان بڕوایان بە حەشدی شەعبی هەبووایە ئەوا لە نەخۆشی و ئازارەکانی چیادا نەدەمان و دەگەڕانەوە سەر ماڵ و موڵکی خۆیان، کەچی خەڵک بڕوایان بە حەشد و هاوئاوازاەکانی نییە و ناگەڕینەوە."

تا حەشدی شەعبی لە شنگال بێت خەڵک ناگەڕیتەوە

قاسم شەشۆ، کە فەرماندەی فەرماندەییی پێشمەرگەی شنگالە، دەڵێت: "چیی تر ئێزدییەکان بڕوایان بە هیچ هێزیکی وەک حەشدی شەعبی و ئەوانەی دیکە نەماوە و تا فەرماندەییی پێشمەرگەی شنگال نەگەڕێتەوە شنگال، خەڵک بڕوایان بە هیچ هێزیکی ئەمنی نابێت." قاسم شەشۆ گوتی: "حەشدی شەعبی هاتووە ئەجێندای وڵاتان جێبەجێ بکات ئەگەرنا هیچ مفایەکی لە شنگالدا نییە."

حەشدی شەعبی هێزیکی میلیشاییە و بەوە ناسراوە هەر جێگایەک بگاتێ کاولکاری بە دوای خۆیدا دەهێنت و ئەو هێزە بە فتوایەکی مەرجەعی ئایینی لە نەجەف دروست کرا و لە ٦٧ لق و پۆپی سەربازی پێک دێت و لە ٢٦ی نۆڤەمبەری ٢٠١٦ ئەنجومەنی نوێنەرانی کردییە بەشێک لە سیستەمی بەرگریی عێراق."

پێشلکارییەکانی حەشدی شەعبی

لەبارەی هەبوونی خرووقاتی حەشدی شەعبییەوە شەشۆ گوتی: "جگە لەو هەموو مەترسییە، حەشدی شەعبی ڕۆژانە دەیان پێشێلکاری دەکات و هەموو ئەو عەرەبانەیان هێناوەتە شنگال کە دەستیان لەگەڵ داعشدا هەبووە بۆ هێرشی سەر شنگال و کۆمەڵکوژیی کوردانی ئێزدی، ئەمەش دەبێتە مەترسی بۆ سەر شنگالییەکان کە ئەو کەسانە کۆمەڵکوژییەکی دیکە بەسەر ئیزدییان بهێنن و ڕۆژانەش باج لە خەڵک وەردەگرن و لە سنووری سووریاوە زالگەیان داناوە و باجێکی گەورە لە خەڵک وەردەگرن."

لە ڕووی کارگێڕشەوە خرووقاتی حەشدی شەعبی هەن. لەم بارەیەشەوە، مەحما خەلیل، قایمقامی شەرعیی شنگال بە ماڵپەڕی فەرمیی پارتی دیموکراتی کوردستانی گوت: "ئێستا حەشدی شەعبی دەستی بەسەر ئیدارەی شنگالیشدا گرتووە و قایمقام و چەندین بەڕێوەبەری ناحیەشیان لە شنگالدا داناوە و خەڵکی شنگالیش لەدەست نەبوونی خزمەتگوزای لە شنگالدا دەناڵێنن و شنگالییەکان دەزانن حەشدی شەعبی بۆ خزمەتکردنی شنگال و شنگالییەکان نەهاتوونەتە شنگال، بەڵکو زیاتر بۆ ئامانجە سەربازییەکان و ئەجێندای وڵاتان هاتوونەتە شنگال، چونکە ئێستا بە دەیان قەیران لە شنگالدا سەریان هەڵداوە و حەشدی شەعبی گوێ بە خەڵکی شنگال نادات."

شنگال، بە عەرەبی ''سنجار''، ناوچەیەکی کوردستانیی دەرەوەی ئیدارەی هەرێمە، دەکەوێتە سەر سنووری سووریا و ئەوپەڕی باشووری ڕۆژئاوای هەرێمی کوردستان و زیاتر لە ١٢٠ کیلۆمەتر لە شاری مووسڵەوە دوورە.

لە ١٦ی ئۆکتۆبەری ساڵی ڕابردوو باڵێکی خیانەتکاری نێو لایەنێکی کوردستانی، کە بە ''ناپاکەکان'' ناسراون، کەرکووکیان ڕادەستی حەشدی شەعبی کرد و دواتر ڕێگایان بۆ خۆش کردن، چەندین ناوچەی دیکە وەک شنگال و باشیک و چەندین ناوچەی دەشتی نەینەوا بکەوێتە دەست ئەو هێزە میلیشایە.

kdp -