ل پارێزگه‌ها دهۆكێ ژ ئه‌گه‌رێ قه‌یرانا دارایى، هه‌تا نها 87 كارگه‌هێن بیناسازى هاتینه‌ داخستن و ئه‌وێن مایى ژى ل به‌ر مه‌ترسیا داخستنێ نه‌، چونكو گۆمرك دناڤبه‌را پارێزگه‌ها دا هاتینه‌ دانان و زیانێن مه‌زن ب كارگه‌هێن بیناسازى هاتیه‌ دان.

نازدار عه‌بدولقادر، رێڤه‌به‌را گه‌شه‌پێدانا پیشه‌سازى ل پارێزگه‌ها دهۆكێ دیار كر، ژ ئه‌گه‌رێ قه‌یرانا دارایى د هه‌ر مه‌هه‌كێ دا هنده‌ك كارگه‌هێن بیناسازى دهێنه‌ داخستن و حكوومه‌ت ژى یا ئاگه‌هداره‌ ل سه‌ر داخستنا ڤان جۆره‌ كارگه‌هان و گۆتیشى: پتریا وان كارگه‌هێن دهێنه‌ داخستن یێن چێكرنا كاشى و تێكه‌لۆك و بلۆكان بووینه‌ و به‌رهه‌مێن وان یێن هاتینه‌ راگرتن.

رێڤه‌به‌را گه‌شه‌پێدانا پیشه‌سازى ل پارێزگه‌ها دهۆكێ، ئاشكرا ژى كر، كو نها ب تنێ كارگه‌هێن خوارنێ درۆست كارێ خوه‌ دكه‌، به‌لێ كارێ وان ژى وه‌كو به‌رێ نه‌مایه‌ و هه‌تا نها 87 كارگه‌هێن بیناسازى و هنده‌ك كارگه‌هێن دى یێن جۆراوجۆر ل پارێزگه‌ها دهۆكێ هاتینه‌ داخستن.

خویاژى كر كو ل سنوورێ پارێزگه‌ها دهۆكێ هزار و 183 كارگه‌هـ هه‌نه‌ و ژ ڤى سه‌رجه‌مى ب تنێ 368 كارگه‌هـ ب شێوه‌یه‌كێ فه‌رمى ل رێڤه‌به‌ریا مه‌ هاتینه‌ تۆماركرن.









باسنيوز