ئەمڕۆ 56 ساڵ بەسەر پێشمەرگایەتیی سەرۆک بارزانیدا تێدەپەڕێت، کە لە چەندین کۆڕ کۆبوونەوە شانازیی خۆی بەو پلەیە، نیشان داوە.



سەرۆک مەسعود بارزانی لە 16/8/1946 لە شاری مەهاباد لەژێر سێبەری ئاڵای کوردستان لە یەکەم کۆماری کوردستان، لەدایک بووە.



دوای سەرهەڵدانی شۆڕشی ئەیلوول بە سەرۆکایەتیی مستەفا بارزانیی نەمری باوکی و رێبەری شۆڕشی رزگاریخوازی کوردستان لە 11/9/1961، بە ناچاری دەستی لە خوێندن هەڵگرتووە و لە رۆژی 20/5/1962 بووەتە پێشمەرگەی ئەو شۆڕشە.



سەرۆک بارزانی لەو رۆژەوەی لە تەمەنی 16 ساڵیدا بووەتە پێشمەرگە، تا ئێستا بەردەوام خۆی وەک پێشمەرگەیەک ناساندووە و پێشمەرگایەتیشی بە خاڵێکی زۆر جێی شانازیی خۆی داناوە.



لە شۆڕشەکانی ئەیلوول و گوڵاندا، سەرۆک بارزانی وەک پێشمەرگە و فەرماندەیەک، رۆڵێکی کاریگەری هەبووە و سەرکردایەتیی بەشێکی زۆر لە شەڕ و داستانەکانی کردووە، کە دیارترینیان داستانی خواکوڕک بوو.



لە دوای هێرشی رێکخراوی تیرۆریستی داعشیشەوە بۆ سەر کوردستان، سەرۆک بارزانی بەردەوام لە سەنگەرەکانەوە لە نزیکەوە رێنمایی دەدایە پێشمەرگە و بەشێکی زۆری چاوپێکەوتن و دیدارەکانی لەگەڵ بەرپرسانی باڵای جیهانیش هەر لەو سەنگەرانەدا ئەنجام دا.