ئەنجومەنی ڕێكخراوی یەسنا بۆ گەشەی فەلسەفەی زەردەشتی لە شاری هەولێر بارەگا دەكاتەوە و سەرپەرشتیاری رێكخراوەكەش جەخت لە بەردەوامیی پێكەوەژیانی ئاشتییانە لە نێوان ئایینە جیاوازەکان لە هەرێمی كوردستان دەكاتەوە.

لالۆ ڕەنجدەر، سەرپەرشتیاری ئەنجومەنی رێكخراوی یەسنا بۆ گەشەی فەلسەفەی زەردەشتی، لەمبارەوە راگەیاند، سبەینێ چوارشەممە 2018/5/16، رێكخراوەكەیان بارەگاکەی لە ناحیەی (عەنکاوە)ی سەر بە شاری هەولێر دەكاتەوە.


ئاماژە بۆ ئەوەش دەكات كە ڕێكخراوەكەیان بایەخ بە لایەنە رۆشنبیرییەكانی ئایینی زەردەشت دەدات و لەو چوارچێوەیەشدا چەندین چالاكیی رۆشنبیری و كولتووریی جیاوازیان دەبێت.

سەرپەرشتیاری رێكخراوەكە جەخت دەكاتەوە ئەوان زەردەشتی بە بناغەی كوردبوون و نەتەوایەتیی خۆیان دەزانن، بە پێویستیشی دەزانێت هەموان پێكەوە كار بۆ پاراستنی ئەو بناغەیە بكەن.


لالۆ ڕەنجدەر باسی لەوەش کرد: "هەرێمی كوردستان ناوچەیەكی ئارامە بۆ سەرجەم ئایین و پێكهاتە جیاوازەكان و دەڵێت ئێمە جێگرەوە نین بۆ هیچ ئایینێك، سەرەكیترین چالاكییەكانیشمان هێشتنەوەی پێكەوەژیانە لە نێوان ئایینە جیاوازەكان لە هەرێمی كوردستان".











باسنیوز