بۆ رەمەزان چەند بڕە خۆراکێک بەسەر ھاووڵاتییاندا دابەش دەکرێت
نەوزاد ئەدھەم، بەڕێوەبەری گشتیی بازرگانی لە وەزارەتی پیشەسازی و بازرگانیی حکوومەتی ھەرێمی کوردستان بە (باس)ی راگەیاند: “بە بۆنەی مانگی رەمەزانەوە بڕی ٥ کیلۆ ئاردی سفر دەدرێتە ھەر خێزانێک و ئاردەکەش لەنێو رەمەزاندا دابەش دەکرێت”.
ئاماژەی بەوەش دا، لەپاڵ ئاردی سفر، بەشە ئاردی مانگانەش دابەش دەکرێت، گوتیشی: “گەنم لە سایلۆکانی کوردستان نەماوە، بەڵام عێراق گەنمێکی زۆری کڕیوە و بۆ ئێمەش رەوانە کراوە، بەم نزیکانە دەست بە دابەشکردنی بەشە ئاردی مانگی سێ دەکرێت”.
بەرپرسەکەی وەزارەتی بازرگانی ئاشکراشی کرد: “لە بەغداوە ئامادەکاری کراوە بۆ ئەوەی بەشەخۆراکێکی تەواو لە مانگی رەمەزان دابەش بکرێت، ئێستا برنج دەنێردرێت، کە تەواو بوو ئیدی دەست بە دابەشکردنی دەکرێت”. بڕیارە لەپاڵ برنجدا شەکر و رۆنیش ھەر لەو مانگەدا دابەش بکرێت.
نەوزاد ئەدھەم روونی کردەوە، جگە لە ئاردی سفر، عێراق بڕیاری نەداوە ھیچ بڕە خۆراکێکی تری تایبەت بۆ رەمەزان دابەش بکات، گوتیشی: “عێراق بەشەخۆراکی مانگانە وەکوو پێویست رەوانە ناکات، بۆیە خەمی ئێمە ئەوە نییە خۆراکی تایبەت بە رەمەزان بدرێت، بەڵکوو ئەوەی ھەیە بە باشی بگات و کوالێتیی باش بێت”.
ئەو کە بەرپرسە لە چاودێریی بازاڕیش، جەختی کردەوە: “لە مانگی رەمەزان لیژنەکانی ئابووری و چاودێرانی بازاڕ سەردانی شوێن و بازاڕەکان دەکەن، بۆ ئەوەی رێگری بکەن لە ھەر ھەوڵێک بۆ گرانکردنی خۆراک و پێداویستیی خەڵک”.
باسنيوز
