سكرتێری پەرلەمانی كوردستان رای دەگەیەنێت، دانیشتنە ئاساییەكانی پەرلەمانی كوردستان دەست پێدەكەنەوە و پڕۆژە یاسای چاكسازیش دەخرێتە بەرنامەی كارەوە.

بێگەرد تاڵەبانی، سكرتێری پەرلەمانی كوردستان، لەمبارەوە رايگەیاند: "ئەمڕۆ دوشەممە 14-5-2018 یەكەم رۆژی دەستپێكردنەوەی دەوامی پەرلەمان دەبێت و لەم هەفتەیەدا لەگەڵ لیژنەی یاساییدا كۆ دەبینەوە و بڕیار لەسەر ئەوە دەدەین چ پڕژە یاسایەك بخەینە بەرنامەی كارەوە".

سكرتێری پەرلەمانی كوردستان ئاماژە بۆ ئەوەش دەكات كە ئەم هەفتەیە تەنیا بەرنامەڕێژی دەكرێت و هەفتەی داهاتوو دانیشتنەكانی پەرلەمانی كوردستان دەست پێدەكەنەوە".

لەبارەی پڕۆژە یاسای چاكسازی كە بەهۆی هەڵبژاردنەكانی پەرلەمانی عێراقەوە دوا خرابوو، بێگەر تاڵەبانی رای گەیاند: "لیژنەی یاسایی پڕۆژەكە تاوتوێ دەكاتەوە و ئەو مادانەی كە تێبینیان لەسەرە، بۆچوونی حكوومەتی لەسەر وەردەگیرێت".

سكرتێری پەرلەمانی كوردستان باس لەوەش دەكات كە دوای وەڵامدانەوەی حكوومەتی هەرێمی كوردستان، پڕۆژە یاساكە دەخرێتە بەرنامەی كارەوە و دانیشتنی لەسەر دەكرێت.








باسنيوز