ئەمڕۆ هەینی ژمارەیەكی زۆری هاووڵاتیانی كەركووك لە خۆپێشاندانێكی ناڕەزاییدا داوایان كرد بەرپرسانی كەركووكی كۆمسیۆنی باڵای سەربەخۆی هەڵبژاردنەكانی عێراق بگۆڕدرێن.


خۆپێشاندەران لەبەردەم بنكەی كەركووكی كۆمسیۆنەكە گردبوونەوە و داوایان كرد بەزووترین كات كارەكانی نووسینگەی كەركووكی كۆمسیۆن ناچالاك بكرێ و لە بەغداوە ئیدارەیەكی نوێی بۆ بنێردرێت.


هەروەها داواشیان كرد لەمەودوا دەنگەكانیان بە دەست جیابكرێتەوە نەك ئەلیكترۆنی، سزای ئەوانەش بدرێ كە ساختەكاریان لە پرۆسەكەدا كردووە و یارییان بە ئەنجامی دەنگەكان كردووە.


خۆپێشاندەرانی كەركووك رایانگەیاندووە بەڵگەی وێنەیی و ڤیدیۆییان هەیە لەسەر ساختەكاری و خروقاتەكانی لە هەڵبژاردنی تایبەتی پارێزگاكەدا كراوە، بەتایبەتییش لە حەویجە.



لە دوای خیانەتەكەی 16ی ئۆكتۆبەری باڵێكی یەكێتی، كە پارێزگای كەركووكیان رادەستی سوپای پاسداران و حەشدی شیعی كرد، پارێزگاكە كەوتووەتە بارێكی خراپی ئەمنی و بەبێ خاوەن ماوەتەوە.
bas news -