پاڵێواراوێكی پارتی دیموكراتی كوردستان بۆ ئەنجومەنی نوێنەرانی عێراق، داوا لە هاووڵاتیانی هەرێمی كوردستان دەكات لەپێناو داننان بە مافە دەستوری و یاساییەكانی هەرێمدا بچنە سەر سندووقەكانی دەنگدان و ئاماژە بۆ ئەوەش دەكات كە لە رێگەی هەڵبژاردنەوە دەتوانین بوونی خۆمان بسەلمێنین.

تریفە نامق، كاندیدی ژمارە 16ی پارتی دیموكراتی كوردستان بۆ هەڵبژارنی ئەنجومەنی نوێنەرانی عێراق لە پارێزگای هەولێر، رای گەراند: "هەڵبژاردنی ئەمجارە تایبەتمەندیی خۆی هەیە و پەیوەندییەكانی هەرێمی کوردستان و عێراق لە دۆخێكدان كە لەڕڕێگەی كورسییەكانی پەرلەمانەوە دەتوانرێت زۆر پرس لە بەرژەوەندیی كورددا یەكلایی بكرێتەوە".

تریفە باس لەوەش دەكات كە ئەو كێشانەی لە نێوان هەولێر و بەغدا هەن، كێشەی نەتەوەیین، نەك حزبی، بۆیە گرنگە زۆرترین رێژەی هاووڵاتیان بەشداری لە دەنگداندا بكەن، تاكوو لەو ڕێگەیەوە حكوومەتی عێراق ناچار بكەین، دان بە مافە دەستوورییەكانماندا بنێت".

ئەو كاندیدەی پارتی بۆ پەرلەمانی عێراق جەخت دەكاتەوە كە بەدەستهێنانی مافەكانی كورد لەڕێگەی نوێنەرەكانییەوە دەبێت لە پەرلەمانی عێراق، هەر بۆیە پارتی دیموكراتی كوردستان ئامادەیە لەگەڵ هەموو ئەو لایەنانەی كە باوەڕیان بە دیموكراسی، فیدراڵیەت و مافەكانی گەلی كورد هەیە، گفتوگۆ بكات".









باسنیوز