سەرۆكی رێكخراوی چاودێریی جینۆساید: كورد لە بەردەم مەترسییەكی گەورەدایە
دوا قۆناغی جینۆساید لە عەفرین روودەدات
د.ستانتن لەم هەڤپەیڤینەدا لەگەڵ (رووداو) باس لە جینۆسایدی گەلی كورد دەكات، بە تایبەتی لە باكوور و رۆژئاوای كوردستان.
رووداو: جینۆساید وۆچ بەم دواییە هۆشدارییەكی بڵاوكردەوە، بەڵام پێش ئەوەی بچینە لای ئەو هۆشدارییە، باسی جینۆساید وۆچ و كارەكانی ئەو رێكخراوەمان بۆ بكە.
ستانتن: جینۆساید وۆچ یەكەم رێكخراوی بەرەنگاریی جینۆساید بوو كە من لە ساڵی 1999 داممەزراند، لە هەمانكاتدا هاوپەیمانێتی بەرەنگاربوونەوەی جینۆسایدیشم پێكهێنا كە جینۆساید وۆچ كاری هەماهەنگیی بۆ دەكات، ئێستا ئەو هاوپەیمانێتییە زیاتر لە 37 رێكخراو لە هەموو جیهانەوە تێیدا ئەندامن. هاوپەیمانێتییەكە زۆر لە جینۆساید وۆچ گەورەترە. ئامانجمان ئەوەیە رێگری لە جینۆساید بكەین و ئەگەریش جنیۆسایدەكە روویدا، بكەرەكەی سزا بدەین. بۆیەش ئێمە بۆ نموونە رۆڵێكی سەرەكیمان هەبووە لە پێكهێنانی دادگای تایبەت بە رواندا، من خۆم یەكێك لەوانە بووم كە بڕیارنامەی نەتەوە یەكگرتووەكانی تایبەت بە پێكهێنانی ئەو دادگایەمان نووسی، بەڵام ئەوەی بۆ خۆم گرنگ بێت، دادگای تایبەت بە كامبۆدیا بوو كە خۆم رێساكانیم نووسی، بەو پێیەش من لە 1991ەوە دەستم بە كاركردن لەسەر جینۆساید كردووە، واتە ئەو كاتەی كارم لەسەر پڕۆژەی كامبۆدیا لەبارەی جینۆسایدەوە دەكرد، لە سكوڵی یاسای زانكۆی یێل بووم. سزادان بەشێكە لە كارەكەی ئێمە، بەڵام پەروەردەی بواری جینۆسایدیش كاری ئێمەیە، وەك چۆن زۆر كاری پەرەپێدانی وانەكانی سكوڵەكان دەكەین، لە هەوڵیشداین بۆ ئەوەی كۆمەڵێك چاكسازی لە دامەزراوە نێودەوڵەتییەكاندا بكەین، تاوەكو بە كردەوە رێگە لە جینۆساید بگرین، ئەمەش بەو مانایەیە كە پشتگیری لە دروستكردنی هێزی كاردانەوەی خێرا دەكەین، ئەمەش بۆ كارەكەی ئێمە زۆر گرنگە، مەبەستم میكانیزمەكانی هۆشداریدانی پێشوەختە. ئەمەش یەكێكە لەو كارە سەرەكییانەی جینۆساید وۆچ دەیانكات، چونكە ئێستا تێدەگەین لەوەی جینۆساید چۆن دەستپێدەكات، ئێمە هۆشداری سەبارەت بە جینۆساید بڵاودەكەینەوە، وەكو چۆن ئێستاش سەبارەت بە دۆخی كورد هۆشدارییەكمان بڵاوكردووەتەوە.
رووداو: وابزانم دوایین هۆشداری كە بڵاوتان كردبێتەوە لەسەر مەترسی جینۆسایدی كورد بووە. بۆچی لەم كاتەدا هۆشداری دەدەن؟
تیرۆریزم بووەتە بیانووی دیكتاتۆرەكان بۆ جینۆساید
ستانتن: ئێمە بڕوامان وایە كورد لەبەردەم مەترسییەكی گەورەدایە، ئەمەش نەك هەر لەلایەن ئەو هێزانەی كە زۆرجاران هەڕەشەیان دروستكردووە، بەڵكو لەم دۆخەی ئێستادا پێمانوایە گەورەترین مەترسی لە توركیاوە دێت، زۆر روون و ئاشكرایە توركیا دەیەوێ شكست بەو كوردانە بهێنێ كە توركیا بە مەترسییان دەزانێ لەسەر خۆی. وەكو خۆیشت دەزانی كورد لەناو توركیاشدا هەن كە بۆ ماوەیەكی درێژ دژایەتیی دەوڵەتی توركیایان كردووە و داوای جۆرێك لە ئۆتۆمییان كردووە. ئەردۆغان، سەركۆماری توركیا، هەموو ئەم خەڵكە بە تیرۆریست ناودەبات، ئەوەی ئێمە لەبارەی ئەو زاراوەی تیرۆریزمەوە دەیزانین ئەوەیە كە ئەم دەستەواژەیە بۆ لە مرۆڤایەتی خستن بەكاردێت، واتە لە رێگەی ئەم زاراوەیەوە دەڵێی ئەم خەڵكە مرۆڤێكی تەواو نین و پێمانوایە دەبێ بیانكوژین. ئەمەش ئێستا بووە بە تەكتیكێكی زۆر باوی دیكتاتۆرەكان.
رووداو
