وەزارەتی پەروەردەی هەرێمی کوردستان لە راگەیێندراوێکدا رایدەگەیێنێت، رۆژی چوارشەممە لە هەولێر و دهۆک پشووی فەرمییە، بەڵام لە سنووری سلێمانی، هەڵەبجە، گەرمیان و راپەڕین پشوو نییە و دەوام هەیە.

هاوکات وەزارەتی خوێندنی باڵای هەرێمی کوردستانیش رایدەگەیێنێت، زانکۆکان سەر پشککراون لەوەی دەوام دەکەن یاخود نا، چونکە ساڵنامەی تایبەت بە خۆیان هەیە.

عەباس ئەکرەم، گوتەبێژی وەزارەتی خوێندنی باڵا و توێژینەوەی زانستی هەرێمی کوردستان راگەیاند "زانکۆکان سەر پشککراون لەوەی دەوام دەکەن یاخود نا، چونکە ساڵنامەی تایبەت بە خۆیان هەیە و بەپێی ئەو ساڵنامەیە دەوامی خۆیان دەکەن".

هاوکات لە راگەیێندراوێکدا کە رۆژی سێشەممە 17-4-2018، بڵاوکراوەتەوە، وەزارەتی پەروەردەی هەرێمی کوردستان رایدەگەیێنێت "لە سنووری هەولێر و دهۆک، تەنها رۆژی چوارشەممە پشوو هەیە و رۆژی پێنجشەممە دەوام هەیە، بەڵام لە سنووری سلێمانی، هەڵەبجە، گەرمیان و راپەڕین، بەهۆی دواکەوتنی خوێندن بە هیچ جۆرێک پشوو نابێت".

ئەمڕۆ سێشەممە 17-4-2018، سەفین دزەیی، گوتەبێژی حکومەتی هەرێمی کوردستان بەبۆنەی جەژنی چوارشەممە سوور رۆژێکی پشوو راگەیاند و گوتی " رۆژی چوار شەممە 18-4-2018 لە دامودەزگاكانی حكومەتی هەرێمی كوردستان دەبێتە پشووی فەرمی، جگە لە هەردوو وەزارەتی پەروەردە و خوێندنی باڵا لەسەر داوای خۆیان و بەهۆی دواكەوتنی پرۆسەی خوێندن".
rudaw -