بەرپرسێکی پارتی دیموکراتی کوردستان رایدەگەیەنێت، کە میلیشیاکانی حەشدی شەعبی بە نووسراو هەڵکردنی ئاڵای کوردستانیان لە کەرکووک قەدەغە کردووە.

کاوە ئەحمەد، کارگێڕی لقی سێی پارتی لە کەرکووک، ڕایگەیاند: "بانگەشەی ھەڵبژاردنی ئەو لایەنانەی چوونەتە ناو پرۆسەی ھەڵبژاردنەوە لە کەرکووک دەستی پێ کردووە".

کاوە ئەحمەد گوتیشی: "ئەو لایەنانە ناتوانن لە گەڕەکە کوردییەکان زیاتر لە ھیچ کوێیەک بانگەشە بۆ خۆیان بکەن و ئاڵای کوردستانیش بەرز بکەنەوە، حەشدی شەعبی نووسراوێکی دەرکردووە و هەڵکردنی ئاڵای کوردستانی قەدەغە کردووە".

ھەرچەندە یەکێتیی نیشتمانیی کوردستان بارەگای لە کەرکووک ھەیە، بەڵام ھەروەک ئەو بەرپرسەی پارتی رای گەیاند، کاندیدەکانی ئەو حزبە تەنیا دەتوانن لۆگۆ و وێنەکانیان بۆ بانگەشەی ھەڵبژاردن بەکار بھێنن.

قەدەغەکردنی ئاڵای کوردستان لە کەرووک دوای ئەوە دێت، کە دادگای فیدڕالیی عێراق بەرزکردنەوەی ئاڵای کوردستانی لە کەرکووک ”بە یاسایی“ دانا.

http://www.basnews.com/index.php/so/news/iraq/412640

بڕیارەکەی دادگای فیدڕالی دوای سکاڵای بەرەی تورکمانیی عێراق دەرکرا، کە سکاڵای لە دژی رێبوار تاڵەبانی، سەرۆکی ئەنجومەنی پارێزگای کەرکووک بەوەکالەت تۆمار کردبوو، چونکە ئەنجومەنەکە لە 2018/3/28 بڕیاری بەرزکردنەوەی ئاڵای کوردستانی لە فەرمانگە و دامەزراوە فەرمییەکانی کەرکووک، دا.

http://www.basnews.com/index.php/so/news/kurdistan/339165

ڕۆژی 16ی ئۆکتۆبەری ساڵی ڕابردوو، کەرکووک، خورماتوو و ناوچەکانی دەوروبەری کەوتنە ژێر دەستی میلیشیاکانی حەشدی شەعبی و ھێزەکانی عێراق، دواتر ھەریەک لە کۆسرەت ڕەسوڵ عەلی، جێگری یەکەمی سکرتێری گشتیی یەکێتی و شێخ جەعفەر مستەفا، ئەندامی مەکتەبی سیاسی و فەرماندەی یەکەی 70ی ھێزی پێشمەرگەی کوردستان، ئاشکرایان کرد کە گرووپێکی نێو یەکێتیی نیشتمانیی کوردستان لەمەدا بەرپرسیارن و ڕێککەوتنی ژێربەژێریان لەگەڵ میلیشیاکانی حەشدی شەعبی و ھێزەکانی عێراق کردووە و بەو ھۆیەوە سەدان پێشمەرگە و ھاووڵاتی شەھید و بریندار بوون و نزیکەی 200 ھەزار کەسیش ئاوارە بوون.









باسنیوز