ل دەڤەرا دهۆکێ سالیادا ئەنفالان دێ ئێتە ساخکرن، کەس و کارێن ئەنفالکریان دخوازێن قەرەبووکرنا قوربان و زیان ڤێکەفتیێن ئەنفالکریان ژلایێ حکومەتا عیراقێ ڤە بهێتەکرن و یاسایا شەهید و ئەنفالکریان ل حکومەتا هەرێما کوردستانێ بهێتە هەموارکرن داکۆ مافێن وان ب یاسایێ دپاراستى بن.



14-4-1988ێ، کومکوژى و جینۆسایدا مللەتێ کورد لسەر دەستێ رژێما بەعسا عیراقى یا ژناڤچوویێ لسەر دەمێ دکتاتور (سەدام حسین) دەسپێکر و ئەڤە 30 سال لسەر ئەنفالکرنا خەلکێ کوردستانێ بورین تا نوکە حکومەتا عیراقێ یا نوو ب هیچ رەنگەکى قەربووکرنا زەرەمەندێن ڤێ کارەستانا مرۆڤایەتى نەکریە .



عەلى بەندى، بەرپرسێ سەنتەرێ ئەنفال ل دهۆکێ، بۆ مالپەرێ فەرمیێ پارتى دیموکراتى کوردستان گۆت:" هەر دەم مە کار کریە بادەکا ئەنفال ل پێشیا هەمى تشتەکى بیت ژبۆ خوشکرنا ژیارا کەسێن تووش ئەنفاکرنێ بووین و دانەنیاسیانا کەیسا ئەنفالان لسەر ئاستێ جیهانێ و دادگەهکرنا تاوانبار و ئەنجامدەرێن ڤێ کاراستانا مرۆڤى، دیسان هەولدانا سزادانا وان کومپانیێن جەکێ کومکوژ دایە حکومەتا عیراقێ کۆ 207 کومپانیێن نیڤدەولەتى نە، ژ وان 86 کومپانى یێن ئەلمانى نە، جونکى پێشتەڤانێن حکومەتا بەعسا عیراقى یا ژناڤچوویێ بوون ژبۆ ژناڤبرنا کوردان".



کەس و کارێن ئەنفالکریان چ داخوازى هەنە؟



کەس و کارێن ئەنفالکریان دخوازن، ئەو بریارێن حکومەتا عیراقێ دەربارەیى کەیسێ ئەنفاکریان بجه بینن و دخوازن حکومەتا هەرێما کوردستانێ فشارێ بدانیتە سەر حکومەتا عیراقێ داکو بریارێن ژ دادگەها بلندا تاوانان ل عیراقێ دەرکەفتین جێبەجێ بکەت، ژ وان قەرەبووکرنا قوربانى و زیان ڤێکەفتیێن ئەنفالکریان و پتر هەولبدەت کەیسێ ئەنفالێن کوردستانێ لسەر ئاستێ نیڤدەولەتى بدەتە نیاسین و یاسایا شەهید و ئەنفالکریان ل حکومەتا هەرێما کوردستانێ بهێتە هەموارکرن داکۆ مافێن وان ب یاسایێ دپاراستى بن.



بەرپرسێ سەنتەرێ ئەنفالان زەلالکر:" روفاتێن ئەنفاکریێن چەندین دەڤەران ڤەگەراندینە کوردستانێ و جهێن تایبەت بۆ دروستکرینە، بەلێ تا نوکە روفاتێن ئەنفالکری یێن سنۆرێ پارێزگەها دهۆکێ نەهاتینە ڤەگەراندن بۆ کوردستانێ، کو هەر گورەکى نیزیکى 100 قوربانیا تێدانە و ل سنۆرێ پارێزگەها مووسل دڤەشارتینە، بەلێ حکومەتا عیراقێ ب هێجەتا نەبوونا تیمێن شارەزا بۆ دیارکرنا ڤان روفاتا ڤەگەراندنا وان گیروکرینە، ژبەر هندێ گرنگە حکومەتا هەرێما کوردستانێ و ئیدارا پارێزگەها دهۆکێ ب جدى لسەر ڤەگەراندنا روفاتێن ئەنفالکریان براوستیت".



ل سنورێ پارێزگەها دهۆک نیزیکى 5 هزار کەسان بووینە قوربانیێن ئەنفالان و نیزیکى 2 هزار کەسان د بێ سەروشینن و 663 گۆند ژئەنجامێ کیمیابارندن و ئەنفالکرنێ هاتینە وێرانکرن.
kdp-