لە ڕۆژی 5/3/2015دا، مریەم هۆشەنگی، لە ئێرانەوە گەڕایەوە بۆ كوردستان بە ‌هیوای شادبوونەوەی بە كەسوكارەكەی، ئەوە‌بوو ڕۆژی 16ی/3/2015 لە 27 ساڵەی كیمیابارانی هەڵەبجەدا، بە ‌بنەماڵەی ئەحمەد قادر ئاشنا بووەوە، كە كچیان لە كارەساتی هەڵەبجەدا لێ ون بووە و ئێستا هاوسەری ئەحمەد قادر بە ‌ناوی گێلاس ئەسكەندەر لە ژیاندا ماوە،‌ بەڵام ئەو خۆشی و شادییەی مریەم زۆر ناخایەنێت، ئەو بنەماڵەی كە پێیان گوتوون ئەوە منداڵی ئێوەیە، گومانیان لا دروست دەبێت، كە كچی ئەوان بێت، بەڵام دواتر پشكنینی تری بۆ دەكرێتەوە، بەڵام مریەم، هاوناز ئەحمەد قادر نییە و، جارێكی تر بێچارەنووس دەبێتەوە‌.

ئەمڕۆ 10ی 4، دوایین دانیشتنی دادگا دەبێت بۆ یه‌كلاكردنه‌وه‌ی كه‌یسی هاوناز، لەو بارەیەوە، هاوناز هۆشەنگی، بە ماڵپەڕی فەرمیی پارتی دیموكراتی كوردستانی ڕاگەیاند: "نازانم ناوی خۆم بە چی بێنم، ئەمڕۆ 10ی 4ی 2018 دوایین دانیشتنی دادگاییم دەبێت لە دادگای باری كەسیی سلێمانی بۆ وەرگرتنەوەی ناسنامەی هاوناز ئەحمەد قادر لێم و ناونانەوەم بە مریەم هۆشەنگی. چارەنووسێكی نادیار چاوەڕێم دەكات، بۆیە تاكە داوای من لە حكوومەتی هەرێم و بەڕێز سەرۆكی حكوومەت، ئەوەیە جنسییە و تەسكەرەی عێراقیم بدەنێ، با لەم بێچارەییەی ئێستا‌مدا نەمێنمەوە".

لەبارەی ئەوەی كە ئایا پشكنینی تری "دی ئێن ئەی" بۆ كراوە، مریەم هۆشەنگی دەڵێت: "بەڵێ سمپڵی خوێنم لێ وەرگیراوە تاوەكوو جارێكی تر لەگەڵ تەواوی ئەو هاووڵاتیانەی هەڵەبجە كە منداڵی كچیان ون بووە، بەراوردی بكەن و چارەنووسم دیاری بكرێت، كە بڕیارە پشكنینی دی ئێن ئەی لە وڵاتی بەریتانیا ئەنجام بدرێت".

لوقمان عەبدلقادر، سەرۆكی كۆمەڵەی قوربانیانی كیمیابارانی هەڵەبجەیش گوتی: "هەرگیز دەستبەرداری مریەم نابین، ئەو هاوكارییەی كە پێویستی بێت بۆی دابین دەكەین، كە بە سوپاسەوە ئێستا لە لایەن سەرۆكی حكوومەتی كوردستانەوە، شوێنی نیشتەجێبوون و مووچەی تایبەت و خوێندنی زانكۆی بۆ فەراهەم كراوە. ئێستا‌یش چاوەڕێی دوابڕیاری دادگاین لەبارەی كەیسەكەیەوە".

سەرۆكی كۆمەڵەی قوربانیانی كیمیابارنی هەڵەبجە گوتیشی: "تا ئێستا 73 خێزانمان هەیە كە 179 منداڵیان لێ ون بووە و چەندین كەسیش هاتوون و‌ دەڵێن، منداڵی هەڵەبجەیین، سمپڵی خوێنیان لێ وەرگیراوە بۆ ئەوەی بتوانین چارەنووسیان دیاری بكەین".

ڕۆژی 16ی 3ی 1986، ڕژێمی ڕوخاوی به‌عس هەڵەبجەی، كیمیاباران كرد و 10 هەزار بریندار و پێنج هەزار شەهیدی لێ كەوتەوە.
kdp-