بڕیارە سەرەتای هەفتەی داهاتوو، وەفدێکی حکوومەتی هەرێمی کوردستان بۆ چارەسەرکردنی کێشەی شایستە داراییەکانی جووتیارانی پارێزگای هەولێر سەردانی بەغدا بکات.

دوێنێ پێنجشەممە 2018/4/5، نەوزاد ئەدهەم، بەڕێوەبەری گشتی بارزگانی لە وەزارەتی بازرگانی و پیشەسازی حکوومەتی هەرێمی کوردستان لە لێدوانێکی ڕۆژنامەوانیدا ڕای گەیاند: "تا ئێستا حکوومەتی عێراق بڕی ئەو 41 ملیار دینارەی شایستە داراییەکانی جووتیارانی پارێزگای هەولێری بۆ ساڵی 2016 و 2017 خەرج نەکردووە، کە پێشتر بڕیاری خەرجکردنی دابوو".

بەڕێوەبەری گشتی بارزگانی لە وەزارەتی بازرگانی و پیشەسازی گوتیشی: "یەکشەممەی داهاتوو وەفدێکی باڵای بانکی کوردستان سەردانی بەغدا دەکەن بۆ چارەسەرکردنی ئەو کێشەیە".

ئەوەشی خستووەتە ڕوو، دواکەوتنی شایستە داراییەکانی جووتیاران کاریگەری لەسەر کارکردن و بارودۆخی ژیانی جووتیاران دەبێت.

لە مانگی شوباتی ئەمساڵ، حکوومەتی عێراق بڕی 20 ملیار دیناری پارەی گەنمی جووتیارانی سلێمانی و 40 ملیاری پارەی جووتیارانی دهۆك بۆ هەردوو ساڵی 2016 و 2017 رەوانەی هەرێمی كوردستان کرد و بەسەر جووتیاران دابەش كرا، بەڵام تاکو ئێستا بڕی ئەو 41 ملیار دینارەی شایستە داراییەکانی جووتیارانی پارێزگای هەولێر بۆ ساڵی 2016 و 2017 خەرج نەکردووە.

دوێنێش لە پەراوێزی بەشداریکردنی لە پرسەی دلۆڤان ئیدریس بارزانیدا، مەهدی عەلاق، ئەمینداری گشتیی ئەنجومەنی وەزیرانی عێراق، بە ڕۆژنامەنووسانی راگەیاند، پەیوەندییەکانی ئێستای نێوان هەولێر و بەغدا لە گەشەسەندندان و لە سەرجەم بوارەکاندا بەرهەمیان هەیە.

هاوکات ئاماژەشی بەوە کرد کە لە بارەی دەروازە سنوورییەکان و فڕۆکەخانەکان و کێشەکانی دیکەشەوە، گفتوگۆکان بەردەوامن، ”بۆ ئەوەی بە ئەنجامی باش بگەین“.









باسنيوز