سەرکردەیەکی یەکێتیی نیشتمانیی کوردستان ڕای دەگەیەنێت، هێشتا وادەی بانگەشەی هەڵبژاردن دەستی پێ نەکردووە، بۆیە حەقە کۆمیسیۆن لێپرسینەوە لەو ئەو حزبانە بکات کە بانگەشەی هەڵبژاردن دەکەن.

حەمە چاوجوان، بەرپرسی مەڵبەندی یەکێتیی نیشتمانی لە گەرمیان لەبارەی بانگەشەی هەڵبژاردنی لایەنەکانی گۆڕان، کۆمەڵ و یەکگرتوو لە خۆپیشاندانەکاندا ڕای گەیاند: "هێشتا کاتی بانگەشەی هەڵبژاردن دەستی پێ نەکردووە و حەقە کۆمیسیۆن لێپرسینەوە لەگەڵ ئەو لایەنانە بکات، کە بۆ بانگەشەی هەڵبژاردن دەچنە شوێنان، چونکە پێموایە ئەوەی لەناو حکوومەتدا بووە، بەرپرسە لە کێشەکانی ناو حکوومەت".

لەبارەی ڕەخنەکانی گۆڕان، کۆمەڵ و لیستەکانی دیکە لەسەر یەکێتیی نیشتمانی، ئەو بەرپرسەی یەکێتیی نیشتمانی گوتی: "هەندێک ڕەخنە هەیە ئیشیی ئەوان نییە"، ڕوونیشی کردەوە، کە یەکێتی نایشارێتەوە کێشەی ناوخۆی هەیە، هەرچەندە لەوانەیە جیاواز بین و نەتوانین وەک حزبەکانی دیکە کێشەکان دابپۆشین، بەڵام سەرەڕای ئەوانەش کێشەکان نەبوونەتە هۆی ئەوەی لە بەرامبەر بابەتەکاندا کەمتەرخەم بین، چونکە کشانەوە لە حکوومەت مانای ئەوە نییە شتێکی باش بێت، ڕەخنەکانی گۆڕان و کۆمەڵ لەبەر ئەوەیە خۆیان لە حکوومەت کشاونەتەوە".

ئەو بەرپرسەی یەکێتی لە سنووری گەرمیان باس لە مانەوەی بەرپرسەکانی گۆڕان و کۆمەڵ لە دامودەزگاکانی حکوومەتدا دەکات و دەڵێت: "ئێستا قایمقامی کەلار گۆڕانە و بەرپرسی گۆڕان و کۆمەڵ لە شوێنەکانی دیکەش هەن، باشە ئەی ئەگەر ئەوان لە حکوومەت کشاونەتەوە بۆ تا ئێستا ئەو بەرپرسانە نەکشاونەتەوە؟، من پێموایە ئەوەی ئەمڕۆ گۆڕان و کۆمەڵ دەیکەن، بۆ بانگەشەی هەڵبژاردنە و خەڵکیش وشیارە".

لەبارەی ئەوەی ئایا گۆڕان و کۆمەڵ و یەکگرتوو بەرپرسن لەو کەموکوڕییانەی ئێستا لەناو خەڵک باسی دەکەن، حەمە چاوجوان ئاشکرای کرد: "بۆ بەشێک نین؟، ئەگەر ئێمە وەزیرمان هەبێ، ئەوا ئەوانیش هەیانبووە، مەگەر لەم کاتەدا کشابێتنەوە، لە شوێنەکانی دیکەش بەرپرسیان هەیە، ئیتر بۆ ئەوان بەرپرس نین و ئێمە لە ئاستی کێشەکان بەرپرسین؟، بۆیە چەند هەوڵی خۆڵکردنە چاوی خەڵکیش بدەن، ئەوا ئەو بەرپرسانە لەلای خەڵک ناسراون".

ئەو بەرپرسەی یەکێتی ئاماژە بۆ ئەوە دەکات: "بۆ ئەو کاتەی ئەوان لە حکوومەتدا بوون بەرگریان لە حکوومەت دەکرد، ئێستا نازانین بۆ بە شێوەکی دیکە قسە لەسەر حکوومەت دەکەن؟".












باسنیوز