بەهۆی ئەوەی ماوەی چەند رۆژێكە كارمەندانی تەندروستی لە كەلار بایكۆتی دەوامیان كردووە، هاووڵاتییەك لەبەر نەبوونی كارمەند لە نەخۆشخانەكانی كەلار و وەرنەگرتنی چارەسەر، گیانی لەدەست دا.

محەمەد حوسێن، رۆژنامەنووس كە هاوڕێی قوربانییەكە بووە، لە ئەكاونتی خۆی لە تۆڕی كۆمەڵایەتیی (فەیسبووك) بڵاوی کردووەتەوە: "لەبەر نەبوونی نەخۆشخانە (حازم) لە كەلار مرد، حازم باوكی چوار كچ بوو، رۆژانە كاری میوەفرۆشی دەكرد، زەختی خوێنی بەرز بوەوەوە، بەڵام هەموو نەخۆشخانەكانی كەلار بەهۆی خۆپیشاندان و بایكۆتەوە داخرابوون، هیچ دكتۆرێك نەبوو چارەسەری ئەو پیاوە ماندووە بكات، ناچار كەسوكارەكەی دەیبەن بۆ خانەقین تا چارەسەر وەربگرێت، بەڵام بەداخەوە لە رێگادا گیانی سپارد".

ئەو رۆژنامەنووسە ئەوەشی ئاشكرا كردووە: "نزیكەی دوو ساڵ لە تەمەنی هەرزەكاری بە كاری میوەفرۆشییەوە لەگەڵ حازمدا بەسەر بردووە لە گرانییەكەی ساڵانی نەتەوەكاندا لە بەیانییەوە تا درەنگانی ئێواران كاریان كردووە تا 3-4 كیلۆ ئارد و شەكر و چا بۆ ماڵ بكڕن".









باسنيوز