راوێژکاری ئەنجومەنی ئاسایشی هەرێمی کوردستان رایدەگەیەنێت، کە گەلی کوردستان دەرفەتی ئایندەیەکی باشتری لە پێشە.

رۆژی سێشەممە 20/3/2018، مەسرور بارزانی، راوێژکاری ئەنجومەنی ئاسایشی هەرێمی کوردستان بەبۆنەی جەژنی نەورۆز، پەیامێکی بڵاو کردەوە.

لە پەیامەکەیدا مەسرور بارزانی وێڕای پیرۆزبایی ئەو جەژنە لە گەلی کوردستان، خانەوادەی شەهیدان، هێزەکانی پێشمەرگە و ئاسایش، رایدەگەیەنێت، ” بە خۆڕاگری و ئیراده‌ی ئه‌م خه‌ڵکه‌ سه‌ربه‌رزه‌وه‌ به‌رانبه‌ر هه‌موو ئه‌و سه‌ختیانه‌ وه‌ستاینه‌وه‌“.

راوێژکاری ئەنجومەنی ئاسایشی هەرێمی کوردستان دڵنیایی خۆی لەوە نیشان دەدات، کە بە یەکڕیزیی ناوماڵی کوردستان، ” ده‌رفه‌تی ده‌ربازبوون له‌و گرفتانه‌ و دابینکردنی ئاینده‌یه‌کی باشترمان له‌پێشه‌“.


دەقی پەیامەکەی مەسرور بارزانی:


‎سه‌ری ساڵی نوێی كوردی و جه‌ژنی نه‌ته‌وه‌یی نه‌ورۆز، له‌ خانه‌واده‌ی سه‌ربه‌رزی شه‌هیدان، پێشمه‌رگه‌ قاره‌مانه‌کان، كارمه‌ندانی داموده‌زگاكانی ئه‌نجوومه‌نی ئاسایشی هه‌رێم و گه‌لی كوردستان پیرۆز ده‌كه‌م.

ئه‌م جه‌ژنه‌ نه‌ته‌وه‌ییه‌، بۆ ئێمه‌ی گه‌لی کورد مانا و تایبه‌تمه‌ندی خۆی هه‌یه‌، له‌لایه‌ک ده‌ستپێکی ساڵێکی نوێیه‌، له‌لایه‌کی دیکه‌شه‌وه به‌گژداچوونه‌وه‌ی سته‌م و به‌ده‌ستهێنانی ئازادی و سه‌رفرازییه‌.

گه‌لی کوردستان ئێستا به‌ قۆناغێکی سه‌ختدا تێده‌په‌ڕێت، به‌ خۆڕاگری و ئیراده‌ی ئه‌م خه‌ڵکه‌ سه‌ربه‌رزه‌وه‌ به‌رانبه‌ر هه‌موو ئه‌وسه‌ختیانه‌ وه‌ستاینه‌وه‌، بۆیه‌ خه‌ڵکه‌ خۆڕاگره‌که‌مان شایسته‌ی رێز و سوپاسه‌.

دڵنیایین ده‌رفه‌تی ده‌ربازبوون له‌و گرفتانه‌ و دابینکردنی ئاینده‌یه‌کی باشترمان له‌پێشه‌، ئه‌وه‌ش به‌ یه‌کڕیزی نێوماڵی کوردستان. له‌م روانگه‌یه‌وه‌، هیوادارم جه‌ژنی نه‌ورۆز ببێته‌ ئه‌و ده‌رفه‌ته‌ بۆ یه‌کڕیزی نێوان دڵسۆزان و تێکۆشه‌ران، له‌پێناو سه‌رخستنی ماف و داوا ره‌واکانی گه‌له‌که‌مان.

دووباره‌ جه‌ژنتان پیرۆز.


‎مه‌سرور بارزانی

‎راوێژكاری ئه‌نجوومه‌نی ئاسایشی هه‌رێمی كوردستان

20ـی ئاداری 2018









باسنيوز