هاووڵاتییانی شاری کۆبانێ لە رۆژئاوای کوردستان بەرەو شاری عەفرین دەچن، بۆ رێگریکردن لە چوونە ناوەوەی سوپای تورکیا بۆ شارەکە.

بەپێی هەواڵێکی میدیاکانی سەر بە پارتی کرێکارانی کوردستان (پەکەکە)، سەرلەبەیانیی رۆژی یەکشەممە 11/3/2018، سەدان هاووڵاتیی کۆبانێ بەرەو عەفرین بەڕێ کەوتوون.

ئەو هاووڵاتییانەی کۆبانێ هەوڵ دەدەن شان بەشانی هاووڵاتییانی عەفرین و یەکینەکانی پاراستنی گەل (یەپەگە)، عەفرین لە هێرشی سوپای تورکیا و گرووپە ئۆپۆزیسیۆنە توندڕەوەکانی سووریا، بپارێزن.

بەپێی دوایین زانیارییەکان، سوپای تورکیا دەستی بەسەر زۆربەی ناوچەکانی دەوروبەری شاری عەفریندا گرتووە و لەو شارە نزیک بووەتەوە.

لە رۆژی 20/1/2018ـەوە، سوپای ئازادی ئۆپۆزیسیۆنی سووریا و سوپای تورکیا بە بەکارھێنانی ھێزی ئاسمانی، زەمینی و تۆپخانە، لەژێر ناوی ئۆپەراسیۆنی (چلە زەیتوون)، ھێرشیان کردووەتە سەر شاری عەفرین لە رۆژئاوای کوردستان.











باسنيوز