میدیاکانی سەر بە پارتی کرێکارانی کوردستان (پەکەکە) لەبارەی دەستگیرکرانی هاوسەرۆکی پێشووی پارتی یەکێتیی دیموکراتی (پەیەدە)، روونکردنەوە بڵاو دەکەنەوە.

بەپێی ئەو هەواڵانەی میدیاکانی پەکەکە بڵاوی دەکەنەوە، ساڵح موسلیم، هاوسەرۆکی پێشووی پەیەدە و بەرپرسی پەیوەندییەکانی دەرەوەی تەڤگەری جڤاکی دیموکراتی (تەڤدەم)،لە پراگی پایتەختی چیک دەستگیر کراوە.

وەک ئەو میدیایانە بڵاویان کردووەتەوە، ساڵح موسلیم بە سەردانێکی فەرمیی بۆ بەشداریکردن لە کۆنفرانسێک، لە چیک بووە و لە رۆژی شەممە 24/2/2018ـەوە لەلایەن کارمەندانی دەزگای هەواڵگریی تورکیا (میت)ـەوە خرابووە ژێر چاودێری.

دوای دەستگیرکرانی هاوسەرۆکی پێشووی پەیەدە لەلایەن پۆلیسی چیکەوە لە رۆژی یەکشەممە 25/2/2018، حکوومەتی تورکیا دەستی بە جموجۆڵ کردووە بۆ رازیکردنی دەسەڵاتدارانی چیک بە رادەستکردنەوەی ساڵح موسلیم بەو وڵاتە.


رۆژی 13/2/2018، حکوومەتی تورکیا ساڵح موسلیمی خستە ناو لیستی تیرۆری سوور، کە بەپێی بنەماکانی تورکیا، لیستی سوور بە ”ترسناکترین تیرۆریستەکان“ دادەنرێت و فەرمانی دەستگیرکردنی بۆ دەرکراوە.


حکوومەتی تورکیا بڕی چوار ملیۆن لیرەی تورکی ( نزیکەی یەک ملیۆن 500 هەزار دۆلار)ی بۆ هەر کەسێک کردبووە خەڵات، کە زانیاریی بۆ دەستگیرکردنی ساڵح موسلیم، دەدات.

کورتەیەک لە ژیاننامەی ساڵح موسلیم:

- لە ساڵی 1951 لە گوندی شێرانەی سەر بە کۆبانێ لەدایک بووە.

- دەرچووی بەشی کیمیای زانکۆی کنیکی/ کۆلێژی ئەندازیاریی ئیستەنبوڵە لە ساڵی 1977.

- لە یەکەم کۆنگرەی پەیەدە لە ساڵی 2003 بە ئەندامی لێژنەی جێبەجێکردنی پەیەدە هەڵبژێردرا.

- لە کۆنگرەی چوارەمی پەیەدە لە ساڵی 2010، بە هاوسەرۆکی پەیەدە هەڵبژێردرا.

- لە کۆنگرەی حەوتی پەیەدە لە ساڵی 2017، لە پۆستی هاوسەرۆکایەتیی حزبەکەی لادرا.











باسنيوز