تەقینەوەیەکە لەناو بارەگایەکی میلیشیایەکی حەشدی شەعبی لە شاری کەرکووک رووی دا.



تەقینەوەکە سەرلەبەیانیی رۆژی یەکشەممە 25/2/2018 لەناو بارەگایەکی میلیشیای عەسایب ئەهلی حەق لە کەرکووک رووی داوە.



بەپێی زانیارییەکان، ئەو بارەگایەی عەسایب ئەهلی حەق، کە تەقینەوەکەی لێ روو داوە، کەوتووەتە گەڕەکی (ساحە تەیەڕان) و پێش داگیرکردنی شارەکە، بارەگای پارتی گەلی تورکمانی بوو.



زانیارییە سەرەتاییەکان ئاماژە بەوە دەکەن، کە تەقینەوەکە لەڕێی خۆکوژێکەوە رووی داوە و تا ئێستاش ژمارەی کوژراو و برینداران نەزانراوە.



شەوی شەممە 24/2/2018 لە گەڕەکی پەنجا عەلی، بەهۆی تەقینەوەی بۆمبێکی چێندراوەوە، دوو کەس بریندار بوون و چەکدارانی نەناسراویش پەلاماری پۆلیسی نەوت و گازیان لە رۆژئاوای شارەکە، داوە.



دوای داگیرکردنی شارەکە لە ئەنجامی خیانەتی 16ـی ئۆکتۆبەری 2017 لەلایەن حەشدی شەعبییەوە، ئاسایش و سەقامگیریی ئەو شارە بە تەواوی تێکچووە و ئەو گرووپپە چەکدارییانە و هێزە عێراقییەکانیش توانای پاراستنی ئەو شارەیان نییە.


باسنیوز