به‌رپرسێكى ده‌زگاى گشتى كاروبارى مینى هه‌رێمى كورستان ئاشكراى كرد كه‌ به‌هۆى هاتنى وه‌زرى لافاوه‌وه‌، مه‌ترسى ڕاماڵینى مین و ته‌قه‌مه‌نى له‌ ناوچه‌ به‌رزاییه‌كانه‌وه‌ بۆ دامانێنى شاخ و ده‌شتاییه‌كان له‌ ئارادایه‌، بۆیه‌ پێویسته‌ هاووڵاتیان به‌ وریاییه‌وه‌ له‌و ناوچانه‌ بجوڵێنه‌وه‌.


ئاكۆ عه‌زیز، به‌ڕێوه‌به‌رى هۆشیارى ناوچه‌ مین ڕێژكراوه‌كان ڕاگه‌یاند: "ساڵانى پێشوو له‌كاتى ڕودانى لافاو به‌فر و بارانبارینى زۆر، ژماره‌یه‌كى زۆر مین و ته‌قه‌مه‌نى له‌ ناوچه‌ به‌رزه‌كانه‌وه‌ ده‌هاتنه‌ دامێنى شاخ و ده‌شتاییه‌كانى ئه‌و ناوچانه‌ى كه‌ مین ڕێژكراون، ئه‌وه‌ش تا ڕاده‌یه‌ك مه‌ترسى له‌سه‌ر هاووڵاتیانى سنووره‌كه‌ و گه‌شتیاران دروست ده‌كرد".


هه‌روه‌ها گوتیشى، له‌ ئێستادا سه‌ره‌تاى وه‌رزى كردنى گژوگیاى به‌هارییه‌ و هاووڵاتیان بۆ ئه‌و مه‌به‌سته‌ ڕوو له‌و ناوچانه‌ ده‌كه‌ن، بۆیه‌ ئاگاداریان ده‌كه‌ینه‌وه‌ كه‌ به‌ وریایى بجوڵێنه‌وه‌و له‌كاتى به‌دى كردنى هه‌ر مین و ته‌قه‌مه‌نییه‌ك، نزیكترین شوێن ئاگادار بكه‌نه‌وه‌، بۆ ئه‌وه‌ى كارى پێویست ئه‌نجام بدرێت.


ئه‌و به‌رپرسه‌ى ده‌زگاى گشتى كاروبارى مین داواشى له‌ هاووڵاتیان كرد تا شوێنى سه‌لامه‌ت هه‌بێت، بۆ كردنى گژوگیاى به‌هارى و ئه‌نجامدانى گه‌شتوگوزار، ڕوو له‌ناوچه‌ مین ڕێژكراوه‌كان نه‌كه‌ن.
bas news-