به‌ڕێوه‌به‌ری‌ په‌یوه‌ندییه‌كان و پەرەپێدانی پێکەوەژیانی ئایینەکان لە وەزارەتی ئەوقاف ڕای دەگەیەنێت، ئەگەر حکوومەتی عێراق بیەوێت گەشتی عەمرەکاران ڕاستەوخۆ لە هەرێمی کوردستانەوە بۆ سعوودییە نەبێت، ئەوا ئێمە گەشتەکان ڕێک ناخەین و خەڵکیش ناڕوات.



مەریوان نەقشبەندی، به‌ڕێوه‌به‌ری‌ په‌یوه‌ندییه‌كان و پەرەپێدانی پێکەوەژیانی ئایینەکان لە وەزارەتی ئەوقاف ڕاگەیاند: ئەو شاندەی سەردانی بەغدای کرد و گەڕانەوە لەگەڵ دەستەی حەج و عەمرەی عێراق و لێژنەی فڕۆکەوانیی عێراق کۆبوونەتەوە و لەوێشدا باسی ئالیاتی کردنەوەی فڕۆکەخانەکانیان کردووە، هیچ ڕێککەوتنێکیش لەسەر ئەو بابەتە نەکراوە، بەڵام کۆنووسیکیان نوسیووە و بەرزیان کردووەتەوە بۆ بەرپرسانی عێراق ئەوانەی کە بڕیاربەدەستن بۆ کردنەوەی فرۆکەخانەکان".



ئەو بەرپرسەی وەزارەتی ئەوقاف ئەوەشی خستە ڕوو: "ئێمە ئێستا چاوەڕوانی وەڵامی حکوومەتی عێراقین و ئەگەر بێت و حکوومەتی عێراق بیەوێت گەشتەکانی عەمرە ڕاستەوخۆ لە هەرێمی کوردستانەوە بۆ سعوودییە نەکرێت و بچنە بەغدا دواتر بەڕێ بکەون، ئەوا ئێمە گەشتەکان ڕێک ناخەین و خەڵکیش ناڕوات".




باسنيوز