نەقیبەکی ھاتن و چوونا قەزا زاخۆ دیارکر، رۆژانە نێزیکی 2000 ترۆمبێلێن بارھەلگر و یێن تایبەت ژ ئیبراھیم خەلیل بەرەڤ زاخۆ و دھۆکێ دھێن و د جادا نێڤدەولەتی دا دەربازدبن و جادە گەلەک بێ سەخبێریە، لەوما بریار ھاتیە دان جادە بھێتە نووژەنکرن.

موقەدم محەمەد فەھمی، ژ رێڤەبەریا ھاتن و چوونا قەزا زاخۆ، راگەھاند، جادەیا زاخۆ ھەتا کۆمەلگەھا ئیبراھیم خەلیل جادەیەکا نێڤدەولەتی یە و ھژمارەکا مەزن یا ترۆمبێلان رۆژانە د وێ رێیێ را ھاتن و چوونێ دکەن، لایەکێ جادێ، ئەوێ ژ زاخۆ بۆ کۆمەلگەھا ئیبراھیم خەلیل دچیت، ھەموو ھاتیە نووژەنکرن و سەخبێرکرن، بەلێ لایێ دی یێ جادێ ژ کۆمەلگەھا ئیبراھیم خەلیل بۆ زاخۆ ھێشتا نەھاتیە نووژەنکرن و گەلەک یێ بێ سەخبێریە و بریارە ئەڤ جادە ژی بھێتە نووژەنکرن.

ئاشکرا ژی کر کو ب تنێ د سالا بۆری دا ل سەر جادەیا سەرەکی یا کۆمەلگەھا ئیبراھیم خەلیل 45 روودانێن ھاتن و چوونێ پەیدابووینە و حەفت ھاوولاتیان د ڤێ رێکێ دا گیانێ خوە ژ دەست داینە و گۆت ژی: ل لایێ راستێ یێ کۆمەلگەھا ئیبراھیم خەلیل چو ئاریشە نینن و ب شێوەیەکێ گەلەک جوان و ب رێک و پێک ھاتیە نووژەنکرن، ب تنێ لایێ چەپێ ژ کۆمەلگەھا ئیبراھیم خەلیل بۆ زاخۆ مایە و پێدڤی ب نووژەنکرنێ یە.








باسنيوز