گوتەبێژی ئەنجومەنی سەركردایەتیی پارتی دیموكراتی كوردستان لە كەركووك-گەرمیان ڕای دەگەیەنێت، میلیشیاكانی حەشدی شەعبی دەستیان بە هەڵمەتی سڕینەوەی ئاڵای كوردستان لە كەركووك كردووە.



ئەمڕۆ سێشەممە 6/2/2018، عەدنان كەركووكی، گوتەبێژی ئەنجومەنی سەركردایەتیی پارتی لە كەركووك- گەرمیان، ڕاگەیاند: میلیشیاكانی حەشدی شەعبی لە كەركووك، دەستیان بە هەڵمەتێك لەدژی ئەو قوتابخانانەی كردووە كە دیواری قوتابخانەكانیان بە ئاڵای كوردستان نەخشاندووە و ئاڵاكانی كوردستانییان سڕیوەتەوە و لە شوێنەكانیشیان وێنەی ئاڵای عێراقیان لەسەر دروست كردووە و ئەو میلیشیایانە لە شوێنە گشتییەكانی تریش لە هەر شوێنێك وێنەی ئاڵای كوردستان نەخشێرابێت، ئەوا دەیسڕنەوە".



ئەوەشی خستە ڕوو: "تەنانەت لە فولكەی ئەحمەد ئاغا، ئاڵایەكی كوردستان دانرابوو، ئێستا ئەو ئاڵایە لادراوە و ئاڵایەكی یەكێك لە گرووپەكانی حەشدی شەعبی دانراوە.



ڕۆژی 16ی ئۆکتۆبەری ساڵی 2017، حەشدی شەعبی و چەند میلیشیایەکی دیکە، بە ڕێککەوتن لەگەڵ گرووپێکی خیانەتکار، پەلاماری کەرکووک و خورماتوو و خانەقینیان دا و دەستیان بەسەردا گرت و سەدان ھاووڵاتیی کوردیان شەھید و بریندار کرد و نزیکەی 200 ھەزار کەسیش لەو سنوورانە ئاوارە بوون.



ڕۆژی 18ی ئۆکتۆبەری ساڵی 2017، کۆسرەت ڕەسول عەلی، جێگری سکترتێری گشتی یەکێتی لە پەیامێکدا ڕای گەیاند: "ئۆباڵی کارەساتەکانی کەرکووک و خورماتوو لە ئەستۆی کاڵفامەکانی ناو یەکێتی دایە".



ڕۆژی 27/12/2017 جەعفەر شێخ مستەفا، فەرماندەی هێزەکانی 70ی پێشمەرگە و ئەندامی مەکتەبی سیاسیی یەکێتیی نیشتمانیی کوردستان بە ڕاشکاوی ڕای گەیاند: ”هۆکاری 16ی ئۆکتۆبەر ڕیفراندۆم نەبوو، بەڵکوو خیانەتی گرووپێکی نێو یەکێتی بوو“. باسیشی لەوە کرد کە ئەگەر مام جەلال لە ژیان بووایە، ئەو گرووپەی نێو یەکێتی وەک خیانەتکار سزا دەدا.




باسنیوز