ئەمڕۆ یەكشەممە ئیدارەی خۆبه‌ڕێوەبه‌ریى عه‌فرين داواى له‌ رووسيا كرد بێ لایەنی بنوێنێ بەرانبەر لەشكركێشی توركیا و میلیشیا عەرەب و توركمانەكانی "جەیشی حور" بۆ سەر عەفرین، چیتر پشتيوانی تيرۆرى ده‌وڵه‌تى توركيا نەكات.


ئیدارەی عه‌فرين لە بەیاننامەیەكدا رەخنەی لە مۆسكۆ گرتووە لەوەی پشتیوانی لەشكركێشی توركیا دەكات و بەرپرسیارە لەو قەسابخانەیەی ئەنقەرە لە عەفرین دەینێتەوە.


لە بەیاننامەكەی ئیدارەی خۆجێی عەفرین كە یەپەگە سەركردایەتی دەكات، هاتووە "دواى تێپه‌ڕينى 15 رۆژ به‌سه‌ر په‌لامارى توركيا به‌ هاوكاریى رووسيا، كە مرۆڤ و ژینگەی ناوچه‌كه‌ى پێكەوە كردووەتە ئامانج، سه‌دان هاووڵاتى سڤیلی شه‌هيد و بريندار كردووە، بەرگری گەریلاكان بەردەوامە".


عەفرین داوای لە هێزە ئازادیخوازەكانی ناوەخۆی سووریا و ناوچەكە و جیهان كردووه‌ به‌ره‌نگارى لەشكركێشی توركيا ببنه‌وه‌ و پشتيوانى له‌ بەرگریی عه‌فرين بكه‌ن.


هه‌روه‌ها داواشی له‌ حكوومەتی مۆسكۆ كردووە چیتر پشتيوانى له‌ هێرشه‌كانى تیرۆری توركيا بۆ سه‌ر عه‌فرين نەكات و نه‌بێته‌ هاوبه‌شى ئه‌و تاوان و كۆمه‌ڵكوژيانه‌ى توركیا ده‌رهه‌ق به‌ خەڵكی سیڤیلی عه‌فرين ئه‌نجامیان ده‌دات.




باسنيوز