بەڕێوەبەری گشتیی ئاسایشی هەولێر رایدەگەیەنێ لە بازگەی دێگەڵە تەقەی رووبەڕوویان بەرامبەر هیچ کەسێک نەکردووە و ئەوانەی لە رووداوەكەی ئەمڕۆدا بریندار بوون، برینداری شەڕە بەردن. دەشڵێ لە هێزەکانی ئاسایشیش بریندار هەن.


ئێوارەی ئەمڕۆ هەینی 2-2-2018 لە بازگەی دێگەڵە، گرژی لە نێوان چەند هاونیشتمانییەک و هێزە ئەمنییەکانی بازگەکە دروست بوو.


تاریق نووری بەڕێوەبەری گشتیی ئاسایشی هەولێر رایگەیاند "نزیکەی 400 کەس زیاتر هاتنە بازگەی دێگەڵە و دەیانویست بەبێ رێوشوێنی یاسایی و پشکنین داخڵی هەولێر بن".


وەک ئەوەی بڵاوکراوەتەوە، ئەو کەسانە خۆبەخش بوون و ویستوویانە لە هەولێرەوە بچنە عەفرین.


بەڕێوەبەری گشتیی ئاسایشی هەولێر دەڵێ "ئەو كەسانە رازی نەبوون بەوەی کاری یاسایی خۆمان بکەین و دەیانویست بەشێوەی فەوزەوی داخڵ بن، بۆیە گرژی دروست بوو".


بەڕێوەبەری گشتیی ئاسایشی هەولێر رەتی دەکاتەوە تەقەی راستەوخۆ لەو هاونیشتمانییانە کرابێت و ئەوانەی بریندار بوون برینداری فیشەک بن، دەڵێ "تەقەی هەوایی کراوە بۆ بڵاوەپێکردنیان و کۆنترۆڵکردنی دۆخەکە، بەڵام بەهیچ شێوەیەک تەقەی راستەوخۆ نەکراوە و ئەوانەشی بریندار بوون برینداری فیشەک نین، بەڵکو ئەوان بەردیان گرتووەتە هێزە ئەمنییەکان و ئەوانیش هەر بەو شێوەیە وەڵامیان داونەتەوە و لە هێزەکانی ئاسایشیش بریندار هەن کە بەرد و داریان بەرکەوتووە".




باسنیوز