ل قه‌زا شێخان حه‌فت پانزینخانه‌ هه‌نه‌ و سه‌ر ب ئیدارا مووسل ڤه‌نه‌ و پانزینا وان ژ یا پانزینخانێن هه‌رێمێ ئه‌رزانتره‌، له‌وما ئه‌ڤه‌ بوویه‌ ئه‌گه‌ر كو قه‌له‌بالغه‌كا مه‌زن ل سه‌ر وان پانزینخانان په‌یداببیت و گرفت بۆ شۆفێران په‌یدابووینه‌ و قائیمقامێ شێخان ژى بریاره‌كا نوو ل دور دابه‌شكرنا پانزینێ ده‌ركر.



سه‌ردار یه‌حیا، قائیمقامێ قه‌زا شێخان، تایبه‌ت راگه‌هاند، ماوێ حه‌فتیه‌كێ یه‌ رۆژانه‌ قه‌له‌بالغه‌كا مه‌زن ل سه‌ر پانزینخانێن شێخان یێن ب سه‌ر ئیدارا مووسل ڤه‌ په‌یدادبیت و پانزینا وان زوو ڤالادبیت و گرفتا پانزینێ په‌یدادبیت، ئه‌ڤه‌ ژى ژ وێ چه‌ندێ چێبوو چونكو بهایێ پانزینا ب سه‌ر ئیدارا مووسل ڤه‌ ئه‌رزانتره‌ ژ پانزینا دى، له‌وما گه‌له‌ك ژ خه‌لكێ ده‌ڤه‌رێن دى یێن نێزیك شێخان و دهۆكێ قه‌ستا شێخان دكرن بۆ كرینا پانزینێ و ڤێ ژى ئاریشێن مه‌زن بۆ خه‌لكێ ده‌ڤه‌رێ په‌یداكرینه‌.



قائیمقامێ قه‌زا شێخان ئاشكرا ژى كر كو وى ئه‌ڤرۆ رۆژا 2/1/2018 بریاره‌ك ده‌ركر و راگه‌هاند كو ئێدى پانزینا ل پانزینخانێن شێخان دهێته‌ فرۆتن ب تنێ دێ ب كۆبوونێ بیت و خه‌لكێ شێخان ب رێیا پلێتێن ئاهێن خوارنێ دشێن وان كۆبوونێن پانزینێ وه‌ربگرن و چو كه‌سێ ژ ده‌رڤه‌ى شێخان بهێت، نه‌شێت ل وان حه‌فت پانزینخانان پانزینێ دابگریت.



سه‌ردار یه‌حیا ئه‌و یه‌ك ژى نه‌ ڤه‌شارت كو نها لیژنه‌كا تایبه‌ت ب دانا ڤان كۆبوونان هاتیه‌ پێكئینان و هه‌ر ژ ئه‌ڤرۆ و وێڤه‌ دێ ده‌ست ب دابه‌شكرنا كۆبوونان هێته‌ كرن.


bas news-