رێڤەبەرێ ھاتن و چوونا ناڤ باژێرێ زاخۆ راگەھاند، کو د ماوێ ڤێ ھەیڤێ دا رۆژانە مەفرەزە بۆ دەستەسەرکرنا ماتۆرسکلێن نە تۆمارکری ھاتینە دانان و ب سەدان ماتۆرسکل ھاتینە دەستەسەرکرن و خودانێن وان ژی نەرازیبوونێن خۆ دگەھینن.



موقەدمێ مافپەروەر ئازاد تاھا، بەرپرسێ راگەھاندنا ھاتن و چوونا ناڤ باژێرێ دھۆکێ، دیارکر، ژ ئەگەرێ ھندێ روودانێن ماتۆرسکلان بەرەڤ زێدەبوونێ چووینە، لەوما رێڤەبەریا ھاتن و چوونا پارێزگەھا دھۆکێ ب ھەموو رێڤەبەریێن قەزایێن خۆڤە، ھەوەکا مەزن بۆ دەستەسەرکرنا ماتۆرسکلێن نە تۆمارکری و بێ ھژمار ل سەرانسەری پارێزگەھێ دھۆکێ دەستپیکرینە.



بەرپرسێ راگەھاندنا ھاتن و چوونا ناڤ باژێرێ دھۆکێ، ئاشکرا ژی کر، کو ب تنێ د سالا بۆری دا 488 ماتۆرسل ھاتینە دەستەسەرکرن و د ڤێ مەھا ئێک دا د ھەوەکا بەرفرەە دا ل قەزا زاخۆ، پتر ژ 100 ماتۆرسکلان ھاتینە دەستەسەرکرن و ھەموو ژی ل رێڤەبەریا ھاتن و چوونێ د تۆمارکری نینن و گۆتیشی: "د ماوێ سێ سالێن بۆری دا 1100 ماتۆرسکل ھاتینە دەستەسەرکرن، ژ ڤی سەرجەمی ل سالا 2015 ل گشت پارێزگەھا دھۆکێ 219 ماتۆرسکل ھاتینە دەستەسەرکرن و ل سالا 2016 ژی 393 ھاتینە دەستەسەرکرن".



موقەدمێ مافپەروەر ئازاد تاھا، زێدەتر ل دۆر قۆربانیێن ماتۆرسکلی دبێژیت: "د ماوێ سێ سالێن بۆری دا ل سەرانسەری پارێزگەھا دھۆکێ 11 ھاوولاتی بووینە قوربانیێن ماتۆرسکلی و 72 ھاوولاتی ژی برینداربووینە و 79 روودانێن ماتۆرسکلان ژی پەیدابووینە".



خویاژی کر، کو ل ڤێ مەھێ ل قەزا زاخۆ ھژمارەکا مەزن یا ماتۆرسکلان ھاتینە دەستەسەرکرن و ئەڤە ژی بوویە ئەگەر کو خودان ماتۆرسکلێن زاخۆ خۆپێشاندانەکێ بۆ ڤەگەراندنا ماتۆرسکلێن خۆ ل بەردەم رێڤەبەریا ھاتن و چوونا زاخۆ ئەنجام بدەن، د وێ خۆپێشاندانێ دا ماتۆرسکلەک وەکو نەرازیبوون ل سەر بریارا رێڤەبەریا ھاتن و چوونێ سۆتن.



ئەو یەک ژی دیار کر کو پشتی سالا 2014 و ھاتنا ئاوارەیان بۆ پارێزگەھا دھۆکێ بکارئینانا ماتۆرسکلان ب شێوەیەکێ بەربەلاڤ زێدەبوویە و بووینە ئەگەر کو روودانێن ھاتن و چوونێ ژی زێدەتر لێ بھێن، لەوما رێڤەبەریا ھاتن و چوونا پارێزگەھا دھۆکێ ئەڤ بریارە دەرکر و ب تنێ بۆ خزمەتا ھاوولاتیانە.



ئاشکرا ژی کر، کو ھەکە ماتۆرسکل یێ ھژمارەکری بیت چو ئاریشە ل سەر نینە، بەلێ ھەکە یێ تۆزوبا بیت، پێدڤیە ژ ھەرێمێ دەربێخیت و خودانێن وان ماتۆرسکلێن ھاتینە دەستەسەرکرن ئەون یێن ژیێ وان د بن 18 سالیێ دا و مە چو شیان نینن ئاسانکاریان بۆ وان بکەین و گۆتیشی: پێدڤیە ئەو کەسێ ماتۆرسکلی دھاژووت مۆلەت ھەبیت و ماتۆرێ وی ژی یێ درۆست بیت و ب تنێ ل قەزا زاخۆ نێزیکی 250 ماتۆرسکلان ھەنە و د ڤێ ھەوێ دا ب تنێ ل زاخۆ 75 ھاتینە دەستەسەرکرن.
bas news-