کۆنگرەی سوچی بۆ ئاشتەوایی لە سووریا بە فەرمی دەست بەکارەکانی دەکات.



بەپێی هەواڵی میدیا رووسییەکان، لێژنەی سەرپەرشتیاری کۆنگرەکە رایگەیاندووە، بەشداربووان، کە ژمارەیان 1511 کەس، کە 107یان نوـینەری ئۆپۆزیسیۆنی دەرەوەن، لە هەموو پێکهاتە تائیفی، سیاسی و کۆمەڵایەتییەکانی سووریا پێکهاتوون.



رۆژی سێشەممە 30/1/2018، کۆگرەکە بە فەرمی دەست بە کارەکانی دەکات و نوێنەرانی ئۆپۆزیسیۆنی سووریاش لە جنێڤ لە سویسرا، قاهیرە لە میسر، مۆسکۆ لە رووسیا و ئەنقەرە لە تورکیا گەیشتوونەتە شاری سوچی.



هەروەک میدیا رووسییەکان بڵاویان کردووەتەوە، %94.5ـی بەشداربووانی کۆنگرەی گفتوگۆی نیشتمانیی سووریا لە عەرەبی سووریا پێکهاتوون و رێژەکەی دیکەش لە کوردی موسڵمان و ئێزدی، ئاشووری، ئەرمەن، چەرکەس، داغستانی و تورکمان پێک هاتووە.



بڕیارە کۆنگرەکە بە وتارێکی ئەلێکسەندەر لاڤریێنتیڤ، نوێنەری تایبەتیی ڤلادیمێر پوتینی سەرۆکی رووسیا لە سووریا، دەست بە کارەکانی بکات.



ئۆپۆزیسیۆنی نیشتمانیی سووریا و پارتی یەکێتیی دیموکراتی (پەیەدە) و ئەنجومەنی نیشتمانیی کورد لە سووریا (ئەنەکەسە) رەتیان کردووەتەوە بەشداریی کۆنگرەکە بۆ دۆزینەوەی چارەسەرێک بۆ شەڕی ناوخۆیی سووریا، بکەن، کە رووسیا سەرپەرشتیی دەکات و لە شاری سوچی لە باشووری رووسیا ساز دەکرێت.



لە مانگی ئاداری 2011ـەوە (نزیکەی هەشت ساڵە)، شەڕی ناوخۆیی لە سووریا لەنێوان گرووپەکانی ئۆپۆزیسیۆن، رێکخراوە تیرۆریستییەکانی داعش و قاعیدە و رژێمی سووریا دروست بووە.



بەهۆی ئەو شەڕانەوە، کە سەراپای وڵاتەکەی گرتووەتەوە، زیاتر لە پێنج ملیۆن هاووڵاتیی لە ناوخۆی وڵاتەکە، بۆ وڵاتانی دەوروبەر و جیهان ئاوارە بوون و زیاتر لە نیو ملیۆن کەسیش گیانیان لەدەست داوە.
BAS NEWS -