ژمارەیەک کادیری یەکێتیی نیشتمانیی کوردستان لە شارۆچکەی مەخموور، چاوساخی بۆ چەکدارانی حەشدی شەعبی دەکەن کە لە بەرگی پۆلیسی ئیتیحادیدا ماڵی هاووڵاتییانیان پشکنی و دواتر سێ ئەندامی پارتی دیموکراتی کوردستانیان دەستگیر کرد.



پاش ئەوەی (باسنیوز) ئاشکرای کرد کە ڕۆژی یەکشەممە 28/1/2018، چەکدارانی حەشدی شەعبی لە بەرگی پۆلیسی ئیتیحادی، گەڕەکی کوردستانی مەخمووریان پشکنیوە، بە بیانووی گەڕان بە دوای چەک و جلوبەرگی سەربازی. ئەمڕۆ سێشەممە 30/1/2018، عەبدوڵا تاھیر، بەرپرسی ناوچەی پارتی دیموکراتی کوردستان لە مەخمور، بە (باسنیوز)ی ڕاگەیاند: "ئەو ھێزانەی کە ئێستا لە مەخموورن، ھەڵمەتێکی گەڕان و پشکنینیان لە گەڕەکی (کوردستان)ی مەخموور ئەنجام داوە کە کەسانێکی دەمامکدار لە نێو ئۆتۆمبێلە سەربازییەکانیاندا بوون و ماڵ بە ماڵ گەڕاون و ئاماژەیان بۆ ئەو ھێزانە کردووە کە کام ماڵ بپشکنن، بەڵام ئەو کەسانە نەناسراو بوونە".



ئەوەشی نەشاردەوە کە ئەو کەسانە شارەزای گەڕەک و ماڵەکان بوونە.



هەر لەمبارەیەوە سەرچاوەیەکی تایبەت بۆ (باسنیوز) ئاشکرای کرد کە لەو هەڵمەتەی حەشدی شەعبیدا، ژمارەیەک کادیری یەکێتیی نیشتمانیی کوردستان، چاوساخییان بۆ هێزەکانی حەشدی شەعبی کردووە و ئەو کەسە دەمامکدارانەی نێو ئۆتۆمبێلەکان، کورد بوون و کادیری یەکێتی بوون.



سەرچاوەکە ئەوەشی ئاشکرا کرد: ”لە هەڵمەتەکەدا سێ ئەندامی پارتی دەستگیر کراون و دوای لێکۆلینەوە و هێشتنەوەیان بۆ ماوەی 24 کاتژمێر، ئازاد کراون“.



ئەوەشی نەشاردەوە کە سێ کادیری یەکێتی چاوساخییان بۆ هێزەکانی حەشدی شەعبی کردووە و ماڵ بە ماڵ زانیارییان لەبارەی دانیشتووانی ئەو گەڕەکەی مەخموور بە حەشدی شەعبی داوە.



دوای خیانەتی 16ی ئۆکتۆبەری 2017، لە کەرکووک و ناوچەکانی دیکەش، ژمارەیەک کادیری یەکێتی بە فەرمانی گرووپی خیانەتی 16ی ئۆکتۆبەر، چاوساخییان بۆ چەکدارانی حەشدی شەعبی کرد و ماڵی ئەو کوردانەیان نیشان دان کە لایەنگری حزبە سەربەخۆخوازەکانی هەرێمی کوردستانن، بە تایبەتیش لایەنگرانی پارتی دیموکراتی کوردستان.



ڕۆژی 16ی ئۆکتۆبەری 2017، حەشدی شەعبی و چەند میلیشیایەکی دیکە، بەڕێککەوتن لەگەڵ گرووپێکی خیانەتکار، پەلاماری کەرکووک و خورماتوو و خانەقینیان دا و دەستیان بە سەردا گرت و سەدان ھاووڵاتیی کوردیان شەھید و بریندار کرد و نزیکەی 200 ھەزار کەسیش لەو سنوورانە ئاوارە بوون.



ڕۆژی 18ی ئۆکتۆبەری ڕابردوو، کۆسرەت ڕەسول عەلی، جێگری سکترتێری گشتی یەکێتی لە پەیامێکدا ڕای گەیاند: "ئۆباڵی کارەساتەکانی کەرکووک و خورماتوو لە ئەستۆی کاڵفامەکانی ناو یەکێتی دایە".



ڕۆژی 27/12/2017 جەعفەر شێخ مستەفا، فەرماندەی هێزەکانی 70ی پێشمەرگە و ئەندامی مەکتەبی سیاسیی یەکێتیی نیشتمانیی کوردستان بە ڕاشکاوی ڕای گەیاند: ”هۆکاری 16ی ئۆکتۆبەر ڕیفراندۆم نەبوو، بەڵکوو خیانەتی گرووپێکی نێو یەکێتی بوو“. باسیشی لەوە کرد کە ئەگەر مام جەلال لە ژیان بووایە، ئەو گرووپەی نێو یەکێتی وەک خیانەتکار سزا دەدا.




باسنيوز