پۆلیسێن پارێزگه‌ها دهۆكێ د په‌یامه‌كێ دا راگه‌هاند، ئێدى ب چو شێوه‌یان نابیت ته‌قا خۆشیێ ل جهێن گه‌شتیارى بهێته‌ كرن و هه‌ر كه‌سێ ته‌قێ بكه‌ت ژى دێ تووشى پێرابوونێن یاسایى بیت.

رائیدێ مافپه‌روه‌ر، هێمن سلێمان، په‌یڤدارێ رێڤه‌به‌ریا پۆلیسێن پارێزگه‌ها دهۆكێ د په‌یامه‌كێ دا ل په‌یجێ خوه‌ یێ تۆرا كۆمه‌لایه‌تى فه‌یسبووك)راگه‌هاند، گه‌له‌ك هاوولاتى ده‌مێ قه‌ستا گه‌شت و سه‌یرانان دكه‌ن ته‌قا خۆشیێ دكه‌ین و ئه‌ڤه‌ ژى دژى یاسایێ یه‌، چونكو ته‌قا خۆشیێ پتریا جاران دبیته‌ ئه‌گه‌رێ په‌یدابوونا روودانێن دلته‌زین و ئێدى ب چو شێوه‌یان ئه‌ڤه‌ ناهێته‌ قه‌بوولكرن.

ئاشكرا ژى كر كو پشتى ئه‌و روودانا دلته‌زین یا ل رۆژا ئه‌ینى په‌یدابووین ب برینداربوونا سنێله‌كى و هه‌تا نها ژى ژیانا وى ل ژێر مه‌ترسیێ یه‌، پۆلیسێن پارێزگه‌ها دهۆكێ دووڤچوون ل سه‌ر روودانێَ كر و سێ ده‌بانجه‌ و چه‌كه‌كێ ئه‌مریكى ل چیایێ گاره‌ هاتنه‌ ده‌سته‌سه‌ركرن و ڤه‌كۆلین ژى ل گه‌ل خودانێن وان چه‌كان هاتیه‌ كرن و و پێرابوونێن یاسایى ل دووڤ مادێ 405 ژ یاسایا سزایێن عیراقێ دێ هێنه‌ كرن و په‌رێن ڤه‌كۆلینێ ژى بۆ دادگه‌ها ڤه‌كۆلینێ هاتینه‌ ره‌وانه‌كرن.

په‌یڤدارێ رێڤه‌به‌ریا پۆلیسێن پارێزگه‌ها دهۆكێ داخواز ژ هاوولاتیان كر ته‌قا خۆشیێ بهێته‌ راگرتن و ته‌قه‌ ب چو شێوه‌ى بیت تاوانه‌ و پێدڤیه‌ ل هه‌موو جهان ته‌قا خۆشیێ بهێته‌ راوه‌ستاندن دا كو گیانێ هاوولاتیان یێ پاراستى بیت.






باسنيوز